प्रमुख प्रतिपक्षी दल नेपाली कांग्रेसले सोमबार देशैभर केपी शर्मा ओली नेतृत्वको सरकारविरुद्ध शक्ति प्रदर्शन गरेको छ । भक्तपुरमा पनि र्याली र आमसभा सहित नेपाली काँग्रेसले आफ्नो शक्ति प्रदर्शन सम्पन्न गरेको छ ।

पछिल्लो पटक तनहुँमा वरिष्ठ नेता रामचन्द्र पौडेललाई प्रहरीले नियन्त्रणमा लिएपछि तात्तिएको काँग्रेसले सोमबारको शक्तिप्रदर्शनलाई सरकारको सर्वसत्ताबाद बिरुद्ध बिरोध प्रदर्शन भनेको छ । अपरान्हपछि एकसाथ देशभर नेपाली काँग्रेस सडकमा उत्रिएको हो । भक्तपुरमा सृजनानगरबाट काँग्रेसले सरकार बिरोधी नाराजुलुस गर्दै र्याली लगाएको थियो । उक्त र्याली सूर्यविनायक पुगी सभामा परिणत भएको थियो ।

प्रमुख वक्ताको रुपमा सभालाई नेपाली काँग्रेसका उपसभापति बिमलेन्द्र निधीले सम्बोधन गरेका थिए । ओली सरकार मनोमानी ढंगले अगाडि बढेको, भ्रष्टाचार बढेको र जनअपेक्षाअनुसार काम नभएकोले काँग्रेस सडकमा उत्रनु परेको उनले बताए । सोमबारको बिरोध सांकेतिक भएको र अझ सशक्त बिरोधका लागि काँग्रेस तयार भएको उनले सरकारलाई चेतावनी दिए ।

विरोध सभालाई सम्बोधन गर्दै भक्तपुर सभापति दुर्लभ थापाले भक्तपुरमा विकासको नाममा सतारुढ़ दलले जनतालाई भ्रमित गरिरहेको आरोप लगाए । कांग्रेसकै पालामा भएको विकासलाई पनि आफूले गरेको भन्दै शिलान्यास र उद्घाटन गरिने गरिएको उनको आरोप छ । सतारुढ़ दलका सांसद महेश बस्नेतप्रति कटाक्ष गर्दै उनले भने, ”यस्तै हो भने पाँच तले मन्दिरको पनि कुनैदिन शिलान्यास र उद्घाटन हुनसक्छ ।” उनले भक्तपुरमा भएको भनिएको बिकास फेसबुके प्रोपोगान्डा भएको गम्भीर आरोप लगाएका छन्  ।

साँगाको महादेव मन्दिर जोड्ने पुलप्रति पनि उनले आपत्ति प्रकट गरे । तुइनबाट नदि तर्न बाध्य नेपालीलाई साँगाको झोलुङ्गे पुलले जिस्काएको उनले जिकिर गरे । व्यक्तिलाई फाइदा गराउन सरकारी ढुकुटी दुरुपयोग गरिएको भन्दै उनले चुनावमा सबै हिसाव हुने चेतावनी दिएका छन् । गत उपनिर्वाचनमा कृष्णलाल भडेलको जीतको हवाला दिंदै उनले भने ”अबको निर्वाचनमा भक्तपुरमा काँग्रेसको जीतलाई कसैले रोक्न सक्दैन ।”

विरोध प्रदर्शनमा नेपाली काँग्रेस भक्तपुरका नेता तथा कार्यकर्ताहरुको उल्लेखनीय उपस्थिति रहेको थियो ।