भक्तपुर, ९ पुस किसानहरुका लागि सर्वसुलभ मल उपलब्ध गराए/नगराएको बारे भक्तपुर नगरपालिकाले अनुगमन गरेको छ । उपप्रमुख रजनी जोशीको नेतृत्वमा मल वितरण व्यवस्थापन समितिका पदाधिकारीहरुले विभिन्न तीन वटा मल विक्रेता सहकारी संस्थाहरुको अनुगमन गरेका हुन् ।
अनुगमन टोलीले भक्तपुर बचत तथा ऋण सहकारी संस्था लि., सिद्धि कृषि सहकारी संस्था लि. र सिद्धि गणेश सहकारी संस्था लि.को आपूर्ती व्यवस्थापनको अनुगमन गरेको जोशीले जानकारी गराइन । सम्बन्धित कर्मचारी र प्रबन्धकहरुलाई नेपाल सरकारले अनुदान दिएर सुपथ मूल्यमा कृषकहरुलाई उपलब्ध गराउन व्यवस्था गरेको रसायनिक मल व्यवस्थित ढंगले विक्री वितरण गर्न र भक्तपुर नगरपालिकाले निर्धारण गरे वमोजिम युरिया प्रति बोरा रु. १ हजार, डि.ए.पी प्रति बोरा रु. २हजार ४ सय ५० र पोटास प्रति बोरा रु. १हजार ८ सय ५० मा बेच्नको लागि निर्देशन दिइएको उनले जानकारी दिएकी छन् । निर्धारित मूल्य भन्दा बढी लिए कारवाही गरिने उनको भनाइ छ ।
अनुगमनको क्रममा सहकारी संस्थाहरुमा बिल र्भपाई, नगदी रसिद र मल विक्री वितरण फाराम व्यवस्थित रुपले राख्न समेत अनुगमन टोलीले सहकारी संस्थाहरुलाई निर्देशन दिएको थियो । देशको कृषि उत्पादन बृद्धि गर्न नेपाल सरकारबाट अनुदान दिइ मल आपूर्ति गरी कृषकहरुलाई विक्री वितरण गर्न र सो को ‘नियमन र अनुगमन गर्न नगरपालिकाले एक मल वितरण व्यवस्थापन समिति नै बनाएको छ । मल वितरण व्यवस्थापन निर्देशिका २०७७’ अनुसार गठित उक्त समितिले बिहीवार अनुगमन गरेको हो । भक्तपुर नगरपालिका मल वितरण व्यवस्थापन समितिका संयोजक एवं उपप्रमुख रजनी जोशीको नेतृत्वमा भएको अनुगमनमा भक्तपुर नगरपालिकाका मल वितरण व्यवस्थापन समितिका सदस्यद्वय प्रमुख प्रशासकीय अधिकृत र कृषि शाखा प्रमुखको पनि उपस्थिति रहेको थियो ।
