भक्तपुर, ९ पुस सूर्यविनायक नगरपालिकाका मेयर बासुदेव थापा १ महिनामा कोरोना भाइरस संक्रमण(काेभिड १९) मुक्त भएका छन् । गत मङ्सिर ९ गते संक्रमण पुष्टि भएका उनी आज पुस ९ गते संक्रमण मुक्त भएका हुन् ।
संक्रमण पुष्टि भएपछि एक साता होम आइसोलेसनमा बसेका मेयर थापा श्वासप्रश्वासमा समस्या आएपछि अस्पाताल पुगेका थिए । निमोनिया भएको थाहा भएपछि एकसाता सम्म मेडिसिटि अस्पतालमा भर्ना भएर उनले निमोनिया निर्मुल पारेका थिए तरपनि उनको पिसिआर परीक्षण गर्द कोभिड नेगेटिभ प्राप्त हुन सकेन । कोभिड पोजेटिभ नै भएपनि स्वास्थ्य अवस्था सामान्य देखिएपछि उनी डिस्चार्ज भए र घरमै बसेर स्वास्थ्य लाभ गरिरहेका थिए ।
घरमा बसेर स्वास्थ्य लाभ गरिरहेका मेयर थापालाई ४ हप्ता सम्म कोभिडले छोडेन । यसबीच उनले २ पटक परीक्षण गराएका थिए । बिहीवारको तेस्राे परीक्षणमा भने कोभिड नेगेटिभ देखिएपछि उनी ढुक्क भएका छन् । मेयर थापाले आफूलाई एक महिनामा कोभिड नेगेटिभ भएको एक भिडिओ संदेश मार्फत सार्वजनिक गरेका हुन् ।
नगर प्रमुख थापाले आफू नगरबासीलाई कोभिडबाट जोगाउन खटिएको र सोक्रममा आफैं संक्रमित भएको बताएका छन् । संक्रमणका कारण सेवामा रहन नसकेकोप्रति दु;ख व्यक्त गर्दै उनले आफ्नो स्वास्थ्यको चिन्ता गर्दै शुभेक्षा प्रकट गर्ने सबैलाई धन्यवाद ज्ञापन समेत गरेका छन् ।