भक्तपुर, २० पुस भक्तपुर नगरपालिकाका प्रमुख सुनिल प्रजापतिले भक्तपुर १० स्थित केहि विद्यालयको निरीक्षण गरेका छन् । सोमबार उनले विद्यालयहरुको स्थलगत निरीक्षण गरेका हुन् ।
नगर प्रमुख प्रजापतिले निजी क्षेत्रद्वारा संचालित विद्यालयहरु समता शिक्षा निकेतन, इष्ट प्वाइन्ट, रोम्बस र पारागन एकेडेमीको स्थलगत निरीक्षण गरेका थिए । कोभिड-१९ संक्रमण रोकथाम र नियन्त्रणका लागि भन्दै सरकारले गरेको विद्यालय बन्दको करिब ८ महिनापछि खुलेका विद्यालयको अवस्थाबारे बुझ्न उनी विद्यालयमा पुगेका नगरपालिकाले जनाएको छ ।
निरीक्षणपछि नगर प्रमुख प्रजापतिले प्रधानाध्यापकहरुसँग भेट गरी विद्यालयको शैक्षिक अवस्था, स्वास्थ्य संवेदनशीलता, कक्षा सञ्चालन र त्यसको प्रभावकारीताबारे जानकारी लिएका थिए भने कोभिड-१९ को जोखिम अझै कायम भएकाले स्वास्थ्य सतर्कता अपनाउन र कक्षा संचालनमा तोकिएको मापदण्ड पूरा गरी आैपचारिकताका लागि मात्र नभइ प्रभावकारी कक्षा संचालन गर्न निर्देशन दिएका थिए । उक्त निरीक्षणमा भक्तपुर नपा वडा नं. १० का वडाध्यक्ष लक्ष्मीप्रसाद ह्यौंमिखाको पनि उपस्थिति रहेको थियो ।
कोभिड-१९ महामारीका कारण देशैभर बन्द रहेको विद्यालय क्रमिक रुपमा खुल्दै गएका छन् । भक्तपुर नगरपालिकाका विद्यालयमा यसै महिनाबाट भौतिक रूपमै उपस्थित भई कक्षा सञ्चालन भइरहेका छन् । कोभिडको जोखिमलाई ध्यानमा राखी सबै विद्यार्थीलाई मास्क अनिवार्य गरिएको र सामाजिक दुरी कायम गरी आलोपालोमा कक्षा सञ्चालन भइरहेको वताइएकाे छ ।
