भक्तपुर, २४ पुस प्रतिनिधि सभा विघटन गरेका प्रधानमन्त्री केपी शर्मा ओलीलाई भक्तपुर सिडिओ मार्फत चेतावनी पत्र पठाइएको छ । नेपाल कम्युनिष्ट पार्टी (नेकपा) प्रचण्ड–नेपाल समुहले प्रधानमन्त्री ओलीलाई असंवैधानिक कदम फिर्ता लिन संविधानको धारासमेत संलग्न गरी चेतावनी पत्र पठाएको हो ।
शुक्रवार नेकपाको केन्द्रीय सदस्य एवं भक्तपुर जिल्ला इन्चार्ज दिलिप प्रजापति भिष्मको नेतृत्वमा ब्यासीबाट नाराजुलुस गर्दै एक टोली बिरोध पत्र बुझाउन जिल्ला प्रशासन कार्यालय पुगेको थियो । प्रमुख जिल्ला अधिकारी प्रेम भट्टराईले कार्यकक्षबाट तल ओर्लिएर बाटोमै पुगी बिरोध पत्र बुझेका छन् । उनले आफूले प्राप्त गरेको पत्र प्रधानमन्त्रीले पाउने गरी प्रक्रिया अघि बढाउने प्रतिवद्धता प्रकट गरे ।
कार्यक्रममा नेकपा भक्तपुरका जिल्ला सचिव डिपी ढकालले उक्त पत्र बाचन गरेर सुनाएका थिए भने संविधान राम्ररी पढ्न सुझाव दिंदै पत्र संग संविधानसमेत संलग्न गरिएको थियो । उक्त पत्र जिल्ला इन्चार्ज भिष्म, जिल्ला सचिव डिपी ढकाल, बागमती प्रदेश सभाका सदस्यद्वय एवं नेकपा भक्तपुरका नेताहरु डा राजेन्द्रमान श्रेष्ठ र प्रतिमा श्रेष्ठले संयुक्त रुपमा हस्तान्तरण गरेका थिए ।
पत्रमा पौष ५ गते प्रधानमन्त्री केपी शर्मा ओलीले नेपालको संविधानको ठाडो उल्लंघन गरी असंवैधानिक, अलोकतान्त्रिक एवम् स्वेच्छाचारी ढंगबाट प्रतिनिधि सभा विघटन गर्ने प्रतिगामी कदम चालेको स्मरण गराउँदै त्यसको घोर विरोध एवम् भत्र्सना गरिएको छ । त्यसैगरी जनताको ठूलो बलिदानीपूर्ण संघर्षबाट प्राप्त गरिएको ऐतिहासिक राजनैतिक परिवर्तन, संघीय लोकतान्त्रिक गणतन्त्र तथा नेपालको संविधानको रक्षा गर्न, वर्तमान असंवैधानिक कदम तथा सबै प्रकारको प्रतिगामी षड्यन्त्रलाई असफल पार्न र त्यसको लागि जस्तोसुकै संघर्ष गर्न नेपाली जनता सक्षम भएको चेतावनी दिंदै प्रधानमन्त्री ओलीलाई सच्चिन आग्रह गरिएको छ ।
नेकपाले ७७ वटै जिल्ला प्रशासन कार्यालयमार्फत ज्ञापनपत्र र संविधान बुझाउने पूर्वघोषित प्रतिरोधका कार्यक्रम अन्तर्गत शुक्रवार नेकपा भक्तपुरले विरोध पत्र पठाएको नेता देवेन्द्र श्रेष्ठ दिवाकरले जानकारी दिए । नेता श्रेष्ठका अनुसार शनिवार ठिमी ब्यङ्क्वेटमा भक्तपुरभरीका अगुवा कार्यकर्ताको भेला गरी प्रधानमन्त्रीको असंवैधानिक कदम विरुद्ध प्रशिक्षण र प्रतिरोधको कार्यक्रम समेत तय गरिएको छ ।
