भक्तपुर, २६ पुस भक्तपुर नगरपालिकाका प्रमुख सुनिल प्रजापतिले भक्तपुर नगरभित्रका संस्थागत विद्यालयहरूका समस्या र अवस्थाबारे जानकारी लिएका छन् । प्रधानाध्यापकहरूको बैठक बसाली उनले कोभिड-१९ का कारण परेको प्रभाव र पठन पाठनको अवस्थाबारे जानकारी लिएकाहुन ।
आइतबार सम्पन्न बैठकमा नगर प्रमुख प्रजापतिले कोभिड १९ संक्रमण जोखिमका कारण विगत १० महिनादेखि बन्द रहेका विद्यालयहरू माघ १ गतेदेखि भौतिक रुपमा कक्षाहरु सञ्चालन गर्न निर्देशन थिए । वैकल्पिक सिकाईलाई निरन्तरता दिंदै अभिभावकहरूको पूर्व स्वीकृति, व्यवस्थापन समितिको निर्णय र पूर्व तयारी तथा कार्ययोजना बनाई मात्र विद्यालय संचालन गरिनुपर्ने मा जोड दिएका प्रेस संयोजक कीर्तिका प्रजापति जानकारी गराइन ।
विद्यालय सञ्चालन सबैको साझा सरोकारको विषय भएकोले भक्तपुर नगरपालिकाले सम्बन्धित सरोकारवालाहरूको चरणबद्ध छलफलपश्चात माघ १ गतेदेखि कक्षाहरू सञ्चालन गर्ने निर्णयमा पुगेको बताउदै बैठकमा प्रमुख प्रजापतिले भने- ”तर यो बाध्यकारी होइन विद्यार्थीहरुको हितलाई ध्यानमा राखेर विद्यालयहरुले निर्णय गर्न सक्छन् । नगरपालिकाले सहज बनाइदिएको मात्र हो ।”
उनले अभिभावक र विद्यार्थीहरूको भावना बुझेर सुरक्षित ढंगले कक्षा सञ्चालन अगाडि बढाउन अनुरोध गर्दै जिम्मेवारी बाट भाग्ने छुट नगरपालिकाले नदिने स्पष्ट पारे ।
उक्त अवसरमा उपस्थित प्रधानाध्यापकहरूले विद्यालय सञ्चालनको लागि आवश्यक तयारीमा जुटिरहेको र सोको लागि अभिभावकहरूसँग पनि छलफल गरेको, शैक्षिक सत्र सुरु ढिलाई हुँदा विद्यार्थीहरूको विवरण भर्ने विषयमा अन्योल देखिएको, स्थानीय पाठ्यक्रम अगाडि बढाउन सन्दर्भ सामाग्रीको अभाव भएकोलगायतका समस्या सुनाएका थिए ।
कार्यक्रममा भक्तपुर नपाका उपप्रमुख रजनी जोशीशिक्षा शाखा प्रमुख हरिप्रसाद निरौला लगायतले विद्यालय सञ्चालनका क्रममा आवश्यक स्वास्थ्य सुरक्षाका विधि पूर्ण रुपमा पालना गर्न आग्रह गरेका थिए ।