भक्तपुर, १ माघ सूर्यविनायक-९ पलासे स्थित गणेश बाल विकास स्कूल नजिकैको खोल्सामा मृत अवस्थामा भेटिएको शवको पहिचान भएको छ । बिहीवार बिहान उक्त खोल्सामा शव फेला परेको हो ।
प्रहरीका अनुसार मृतक बाल विकास स्कूलका सुरक्षा गार्ड साइला भनिनें लक्ष्मीदास श्रेष्ठ हुन् । सिन्धुपाल्चोक पाँचपोखरी थाङपाल गा.पा. वडा नं. ५ घर भई सूर्यविनायक- ९ महत गाँउ बस्ने ४५ वर्षीय साइला श्रेष्ठ भन्ने लक्ष्मीदास श्रेष्ठको शव फेला परेको महानगरीय प्रहरी परिसर भक्तपुरले पुष्टि गरेको हो ।
मृतक श्रेष्ठ दिउसोको समयमा ज्याला मजदुरीको काम गर्ने र रातको समयमा गणेश बाल विकास स्कूलमा सुरक्षा गार्डको काम गर्ने भन्ने बुझिएको डिएसपी दिपक गिरीले जानकारी दिए । मादक पदार्थ सेवन गरी आफू बसेको कोठामा फर्किने क्रममा खोल्सामा आफै लडी मृत्यू भएको प्रहरीले अनुमान गरेको छ । घटनाको थप अनुसन्धान भैरहेको प्रहरीको भनाइ छ ।