भक्तपुर, ८ माघ गत आइतवार विहान भक्तपुरको होटलबाट पैसा चोरी फरार भएको अभियोगमा ललितपुरबाट एक युवक पक्राउ परेका छन् । पक्राउ पर्ने युवक रामेछाप मन्थली घर भई हाल ललितपुरको गोदावरी- ६ फैडोल बस्ने ३० वर्षीय राज कुमार धामी हुन् ।
प्रहरीका अनुसार भक्तपुर नगरपालिका वडा नं. १ सल्लाघारी चोङ्गा गणेश मोडस्थित भिमेश्वर म:म सेन्टरको काउन्टरबाट १ लाख ७० हजार नगद चोरेर धामी फरार भएका थिए । हाेटल संचालक दोलखाकाे सैलुङ गाउँपालिका -८ घर भई हाल दधिकोट कोठा गरी बस्ने बर्ष ३१ को शंखर खत्री हुन् ।
संचालक खत्रीले सोही होटलमा काम गर्ने धामीले गत आइतबार पैसा चोरेर फरार भएका जिकिर गरेका छन् । संचालकले किटानी जाहेरी गरेपछि धामीलाई पक्राउ गर्न महानगरीय प्रहरी परिसर भक्तपुरबाट प्रहरी नायब निरीक्षक टपेन्द्र भण्डारीको कमाण्डमा प्रहरी टोली खटिएको थियो ।
बुधवार बेलुकी ललितपुरको गोदावरी६ फैडोलमा उनलाई फेला पारी भक्तपुर ल्याइएको र प्रारम्भिक अनुसन्धानमा उनले चोरी स्वीकार गरिसकेको डिएसपी दिपक गिरीले जानकारी दिए । बिहीवार जिल्ला अदालतबाट दिन ७ (सात) को म्याद लिई घटना बारे थप अनुसन्धान भईरहेको प्रहरीको भनाइ छ ।
