भक्तपुर, २२ माघ आन्दोलनरत नेपाल कम्युनिस्ट पार्टी (नेकपा) ले आह्वान गरेको नेपाल बन्द भक्तपुरमा शान्तिपूर्ण ढंगले सम्पन्न भएको छ । अन्य जिल्लाको तुलनामा भक्तपुरमा प्रहरी दमन र मुढभेढ भएन । 
बन्द र आम हड्तालको भक्तपुरमा आंशिक प्रभाव परेको छ । भक्तपुरमा सार्वजनिक यातायात, बित्तिय संस्था, स्कूलकलेज र अन्य कार्यालयहरु ठप्प भएका थिए भने अत्यावश्यक सवारी साधन र केही निजी सवारी निर्वाध चलेका देखिन्थे । बजार बन्द प्राय रहेपनी केहि पसलहरु खुलेका थिए । बन्दकर्ताहरु सडकमा देखिएपनि उनीहरुले बन्दका लागि बल प्रयोग गरेको भने देखिएन । 
भक्तपुर इन्चार्ज दिलिप प्रजापतिको नेतृत्वमा रहेको उक्त टोली सम्यमित र शालिन देखिन्थ्यो । उनीहरुले सडकमै जनवादी गीत घन्काएर नाचेका थिए । सडकमै खाएका थिए र बन्दमा समर्थन र सहयोगका लागि सडकबाटै सर्वसाधारणलाई अपिल गरेका थिए । 
आन्दोलनरत नेपाल कम्युनिस्ट पार्टी (नेकपा) का बन्दकर्ताहरु सडकमै रहेका बेला सत्तारुढ नेपाल कम्युनिस्ट पार्टी(नेकपा)का कार्यकर्ता सोही बाटो हुँदै मार्च पास गर्न खोजेपछि मुढभेढको स्थिति बनेको थियो । भक्तपुर प्रहरी प्रमुख रहेकी एसपी तारादेवी थापाको सुझबुझपछि व्यापक प्रहरी सकृयता भएको थियो भने सत्तारूढ नेकपाका युवाहरु लाई पुरानो बाटो बाट प्रहरी स्कर्टिङ सहित मार्चपास गराइएको थियो । नयाँ बाटोमा परिआए मुढभेढको मनस्थितिमा बसेका आन्दोलनरत नेकपा र आन्दोलन निस्तेज पार्न कस्सिएका सतारुढ नेकपाका कार्यकर्ता बीच भेट हुन नपाएपछि भक्तपुरको सम्भावित झडप टरेको हो । 
आन्दोलनरत नेकपाले भक्तपुरमा आफूहरुको बन्द सफल रहेको दावी गरेको छ । पार्टी सचिव डिपी ढकालले साथ र सहयोगका लागि आम जनसमुदाय लाई धन्यवाद दिँदै आन्दोलन सफल गराएवापत कार्यकर्तालाई बधाई दिएका छन् ।