भक्तपुर, २९ माघदीर्घ दमखोकी रोगका विरामीहरुको लागि खुशीको खबर छ । भक्तपुरमा जापानी सहयोगमा श्वासप्रश्वास पुनर्स्थापना केन्द्रले उपचार शुरु गर्ने भएको हो ।
भक्तपुर नगरपालिकाले संचालन गर्ने उक्त पुनर्स्थापना केन्द्रको आज बिहीवार औपचारिक उद्घाटन गर्ने कार्यक्रम रहेको छ । भक्तपुरका वरिष्ठ नेता एवं नेमकिपाका अध्यक्ष नारायणमान बिजुक्छेंले सेवा संचालनकाे उद्घाटन गर्ने कार्यक्रम तय गरिएको हाे ।
जापान अन्तर्राष्ट्रिय चिकित्सा प्रविधि संस्था (जिम्टेफ) को प्राविधिक तथा आर्थिक सहयोगमा भक्तपुर नगरपालिका वडा नं. ९ तुमचोमा निर्मित श्वासप्रश्वास पुन:स्थापना केन्द्रमा बिहीबारबाटै सेवा संचालन गर्ने तयारी गरिएको वडाध्यक्ष रवीन्द्र ज्याख्वले जनाएका हुन् । पहिलो चरणमा पुन:स्थापना केन्द्रको भवन निर्माण गरेको जिम्टेफले सेवा शुरु गर्न १ वर्ष अघि दोस्रो चरणको सम्झौता गरेको थियो । आज बिहिवार बिहान ११ बजेको औपचारिक कार्यक्रममा नेता बिजुक्छेंले केन्द्रको भवन र सेवा दुवैको उद्घाटन गर्ने बताइएको छ ।
‘जिम्टेफ’ जापानका वरिष्ठ सरकारी चिकित्सकहरुको संस्था हो । केन्द्रको भवन निर्माण पछि त्यसमा चिकित्सा उपकरण खरिद गरी नेपाली चिकित्सकहरुलाई उपचार सम्बन्धि तालिम दिनेकार्य सम्पन्न भएको छ । केन्द्रमा जापानी विज्ञहरुको उपस्थितिमा उपचार हुने जानकारी भक्तपुर पोस्टलाई प्राप्त भएको छ ।
जापानका वरिष्ठ सरकारी चिकित्सकहरुको संस्था जिम्टेफको सहयाेगमा भक्तपुर नगरपालिकामा संचालन हुने केन्द्रले दुई देशका जनताबीचको सम्बन्धलाई थप सुमधुर पार्ने विश्वास गरिएको छ । बढ्दो वायु प्रदुषणसंगै बढेको श्वासप्रश्वास सम्बन्धि दीर्घ रोगीहरुलाई यसले राहत मिल्ने नगर प्रमुख सुनिल प्रजापतिले बताएका छन् ।
उक्त केन्द्रमा दीर्घ दमखोकी रोगका विरामीहरुलाई जापानी फिजियोथेरापी विधिबाट उपचार सेवा प्रदान गरिने बताइएको छ ।