भक्तपुर, ४ फागुन कोरोना भाइरस संक्रमण (कोभिड-१९) विरुद्धको खोप भक्तपुरमा कार्यरत पत्रकारका लागि जिल्लाभित्रै उपलब्ध गराइएको छ । दुधपाटीस्थित भक्तपुर अस्पतालमा जिल्लामा कार्यरत पत्रकारका लागि खोप सेवा शुरु भएको हो ।
नेपाल पत्रकार महासंघ भक्तपुरका अध्यक्ष पुष्करराज बुढाथोकीले भक्तपुरका पत्रकारले भक्तपुर अस्पतालमा खोप लगाउन सक्ने बताए । खोप लगाउन छुटेका इच्छुक पत्रकारलाई भक्तपुर अस्पतालले उक्त सेवा उपलब्ध गराउने उनको भनाइ छ । सरकारले यस अघि काठमाडौंको मिनभवन स्थित सिभिल अस्पतालमा उपत्यकाभित्रका पत्रकारलाई खोप सेवा दिएको भएपनि विविध कारणबस कतिपय पत्रकार खोप लगाउनबाट बन्चित रहेका थिए । आफ्नै नजिकको भक्तपुर अस्पतालमा सेवा उपलब्ध भएपछि भक्तपुरमा कार्यरत पत्रकारले राहत पाएका छन् । उक्त पहलका लागि अध्यक्ष बुढाथोकी र सिङ्गो महासंघ र हपलकर्ताहरुलाई प्रेस संगठन नेपालका भक्तपुर संयोजक संजीप शुभचिन्तकले धन्यवाद ब्यक्त गरे ।
अस्पतालकी मेडिकल सुपरिटेण्डेण्ट डा सुमित्रा गौतमका अनुसार पत्रकारहरुले आफू पत्रकार भएको परिचय खुल्ने सूचना विभागद्वारा जारी परिचय पत्र अथवा नेपाल पत्रकार महासंघको सिफारिस पत्रका आधारमा खोप लगाउन पाउनेछन । उक्त खोप निशुल्क सरकारले उपलब्ध गराएको हो ।
पहिलो चरणमा स्वास्थ्यकर्मीलाई उपलब्ध गराइएको खोप अहिले सरकारी कर्मचारी र पत्रकारका लागि उपलब्ध गराइएको छ । मेसु डा गौतमका अनुसार सोमवार मात्र भक्तपुर अस्पतालमा ७५ जनाले खोप लगाएका छन् । खोप पूर्ण सुरक्षित रहेकोले निर्धक्क खोप लगाई सुरक्षित रहन उनले आग्रह समेत गरेकी छन् । भक्तपुरमा मेसु डा गौतमले आफूले पहिलो खोप लगाई खोप लगाउने कार्यको शुरुवात गरेकी थिइन् ।