भक्तपुर, ७ फागुन भक्तपुर नगरपालिकाले आधारभूत तह (कक्षा ८) को परीक्षा संचालन समितिका पदाधिकारीहरुलाई पद तथा गोपनियताको सपथ ग्रहण गराएको छ ।
आधारभूत तह (कक्षा ८) को उत्तीर्ण परीक्षा-२०७७ को संचालक समिति लाई नगरपालिकाले सपथ ग्रहण गराएको हो ।
बिहीवार एक कार्यक्रमका बीच नगरप्रमुख सुनिल प्रजापतिले समितिका अध्यक्ष प्रेमगोपाल कर्माचार्यसहित सदस्यहरुको पद तथा गोपनीयताको सपथ गराएका हुन् । कार्यक्रममा सामूहिक परीक्षा समिति, सार्वजनिक मावि संयुक्त परीक्षा समिति, प्याब्सन, इसान एनप्याब्सनका प्रतिनिधिहरुले समेत कक्षा ८ को परीक्षालाई गोप्य, शान्तिपूर्ण र मर्यादित ढंगले सम्पन्न गर्न सपथ ग्रहण गरेका छन् ।
उक्त अवसरमा नगर प्रमुख प्रजापतिले परीक्षा विद्यार्थीको सिकाइ मूल्यांकन गर्ने माध्यम भएकोले यसलाई मर्यादित बनाउनुपर्ने बताए । परीक्षालाई मर्यादित ढंगले संचालन गर्न सकेमात्र शिक्षाको प्रतिफल प्राप्त हुने उनको भनाइ छ । विद्यार्थीलाई अनुशासनमा राख्न र विद्यार्थी र विद्यालयको सिकाइ उपलब्धी जाच्न परीक्षा मर्यादित बनाउनुपर्ने प्रमुख प्रजापतिले प्रष्ट पारे । नगरपालिकाले शिक्षालाई बढी महत्व दिएको स्मरण गराउदै उनले गुणस्तरीय शिक्षाका लागि गुणस्तरीय परीक्षा संचालन गर्न निर्देशन दिए ।
