भक्तपुर नगरपालिकाका प्रमुख सुनिल प्रजापतिले कोभिड १९ विरुद्धको खोप लिन  नगरवासीहरुलाई अनुरोध गरेका छन् । ज्येष्ठ नागरिकहरुका लागि खोप सञ्चालन भइरहेका स्वास्थ्य केन्द्रहरुको स्थलगत निरीक्षण पछि उनले उक्त अनुरोध गरेका हुन् ।

बुधवार उनले नगरपालिका भित्र खोप सेवा संचालन भएका अस्पताल र स्वास्थ्य संस्थाको स्थलगत अवलोकन निरीक्षण गरेका थिए । सो क्रममा उनले भक्तपुर अस्पताल दुधपाटी,सिद्धि स्मृति महिला तथा बाल अस्पताल भेलुखेल, इवामुरा अस्पताल सल्लाघारी, जनस्वास्थ्य सेवा केन्द्र च्याम्हासिंह र जनस्वास्थ्य सेवा केन्द्र भगवतीस्थान सहित ५ ठाउँमा संचालित खोप सेवाको स्थलगत निरीक्षण गरेका प्रेस संयोजक कीर्तिका प्रजापतिले जानकारी गराइन् ।

निरीक्षणका क्रममा नगर प्रमुख प्रजापतिले खोप केन्द्रका स्वयम्सेवक तथा स्वाथ्यकर्मीहरुसँग खोप लिएका ज्येष्ठ नागरिकहरुको स्वास्थ्यसम्बन्धी तथ्य र तथ्यांकबारे जानकारी लिएका थिए ।साथै, उनले कोभिड १९ विरुद्धको खोप लगाइ उक्त रोगबाट सुरक्षित हुन जिम्मेवारीपूर्वक आफ्नो कर्तव्य पालनाको लागि निर्देशनसमेत दिएका थिए ।

भक्तपुर नगरपालिकाभित्र कोभिड १९ रोगविरुद्ध पहिलो चरणको खोप लगाउने अभियान २०७७ साल फागुन २३ गते आइतबारदेखि सुरु भइरहेको छ । ६५ वर्ष उमेरदेखिका ज्येष्ठ नागरिकहरुलाई लगाइने उक्त खोप माथि उल्लेखित स्वास्थ्य केन्द्रहरुबाट पायक पर्ने केन्द्रबाट प्रदान भइरहेको नगरपालिकाले जनाएको छ ।