भक्तपुर, ६ चैत २०७७श्रमजीवी पत्रकारले पाउने न्यूनतम पारिश्रमिक रकम निर्धारणका लागि सरकारलाई सिफारिस गर्न बनेको न्यूनतम पारिश्रमिक निर्धारण समितिको सदस्यमा नमस्ते ख्वप टेलिभिजनका संचालक ऋषिकेश श्रेष्ठ नियुक्त भएका छन् । श्रेष्ठलाई सूचना तथा संचार मन्त्रालयले न्यूनतम पारिश्रमिक निर्धारण समिति सदस्यमा नियुक्त गरेको हो ।
सूर्यविनायक १ सिरुटार निवासी श्रेष्ठ नृत्य निर्देशक समेत हुन् । उनी सत्तारुढ नेकपा एमालेका नेता एवं सांसद महेश बस्नेत निकट मानिन्छन् । उनीसंगै प्रेस चौतारीकी नेतृ एवं पत्रकार महासंघ सिन्धुलीकी उपाध्यक्ष बिमला पाण्डे पनि समिति सदस्यमा नियुक्त भएकी छन् । समितिको अध्यक्षमा यस अघि नै प्रेस चौतारीका पूर्व अध्यक्ष राजेन्द्र अर्याल नियुक्त भएका छन् ।
श्रमजीवी पत्रकार ऐन, २०५१ पहिलो संशोधन २०६४ अन्तर्गत न्यूनतम पारिश्रमिक निर्धारण समितिको ब्यवस्था भएको हो । यसले श्रमजीवी पत्रकारले पाउने न्यूनतम पारिश्रमिक रकम निर्धारण गर्न तथा त्यस्तो पारिश्रमिक रकम आवश्यकता अनुसार पुनरावलोकन गर्ने सम्बन्धमा नेपाल सरकार समक्ष सिफारिस गर्ने कार्य गर्दछ ।