भक्तपुरको पहिचानसंग पनि जोडिएको ऐतिहासिक विस्काः जात्रा मनाउन नदिने जिल्ला प्रशासन कार्यालयको सूचनाप्रति भक्तपुरबासी जनताले असन्तुष्टि व्यक्त गरेका छन् । सोमबार स्वस्फूर्त रुपले न्यातापोला क्षेत्रमा उक्त सरकारी सूचनाको विरोध गर्दै असन्तुष्टि व्यक्त गरिएको हो ।

जात्रा मास्न पाइदैन, अविवेकी प्रशासन चाहिंदैन भन्दै उपस्थित मानिसहरुले प्रशासन विरुद्ध नाराबाजी समेत गरेका थिए । राजनीतिक सभाजुलुस गर्न दिने, आर्थिक मेलामहोत्सव गर्न दिने तर सस्कृती र परम्परासंग जोडिएको ऐतिहासिक विस्काः जात्रा रोक्ने निर्णय अस्वीकार्य भएको उपस्थित विरोधकर्ताहरुले बताए । उक्त विरोध प्रदर्शनमा र्याली समेत गरिएको थियो । प्रदर्शनकारीहरुले स्थानीय प्रशासनसंगै स्थानीय सरकार र स्थानीय नेताहरुप्रति पनि आक्रोश पोखे ।

भक्तपुरका प्रमुख जिल्ला अधिकारी प्रेम प्रसाद भट्टराईको संयोजकत्वमा बसेको जिल्लास्तरीय कोभिड–१९ संकट व्यवस्थापन केन्द्रले कोभिड -१९ को हवाला दिंदै भिडभाड रोक्न जात्रामा अंकुश लगाउने निर्णय गरेको हो । जिल्ला प्रशासन कार्यालयले एक सूचना जारी गर्दै कोरोनाको कारण विस्काः जात्रालाई गत वर्ष जस्तै औपचारिकतामा सिमित गर्न अनुरोध गरेपछि स्थानीय आक्रोसित बनेका हुन् ।