भक्तपुर, ३० चैतकाठमाडौँको ठमेलस्थित एक होटेलमा जुवा खेलिरहेको अवस्थामा भक्तपुरका एक युवकसमेत पक्राउ परेका छन् । ११ जना पक्राउ पर्दा भक्तपुरका युवकसमेत पक्राउ परेका हुन् ।
पक्राउ पर्नेमा भक्तपुरको सूर्यविनायक- ८ का ३८ वर्षीय श्याम तामाङ रहेका प्रहरीले जानकारी गराएको हो । सञ्चयकोष भवन नजिक रहेको होटल आर्य तारामा जुवा खेलिरहेको अवस्थामा ११ जनालाई पक्राउ गर्दा सूर्यविनायक ८ का तामाङ पनि पक्राउ परेका हुन् ।
पक्राउ पर्नेहरुमा धेरैजसो काभ्रेका रहेका छन् । काभ्रेको धुलिखेल-६ का ३६ वर्षीय अर्जुन लामा, पाँचखाल -१ का ३० वर्षीय राज कुमार लामा, बनेपा-५ का ३५ वर्षीय रण बहादुर तामाङ, पाँचखाल -११ का ३७ वर्षीय सुर्य लामा, बनेपा-१४ का ३५ वर्षीय भुवन सिंह तामाङ, माझीफेदा ८ का ३० वर्षीय समिर तामाङ पक्राउ परेका प्रहरीले जनाएको छ ।
त्यस्तै रामेछापको शैलुङ-५ का ३० वर्षीय कबिन घिसिङ, दोरम्बा -५ का ३२ वर्षीय कर्म लामा पक्राउ परेका छन् । ओखलढुंगा खिचिकाती-९ का ३९ वर्षीय हेम बहादुर खत्री र धादिङको ज्वालामुखी गापाका ४८ वर्षीय होटल सञ्चालक बासु सिंखडालाई पनि पक्राउ गरिएको महानगरी प्रहरी परिसर काठमाडौँका प्रहरी उपरीक्षक रमेशकुमार बस्नेतले जानकारी दिएका छन् ।
उनीहरुलाई दरवारमार्गबाट खटिएको प्रहरीले पक्राउ गरेको हो । प्रहरीले जुवाखालबाट ६ लाख २६ हजार नगद समेत बरामद गरेको जनाएको छ ।