भक्तपुर, ३ बैशाख भक्तपुरको चुनदेवीमा सडक दुर्घटनामा परि दुइ युवकको ज्यान गएको छ । चालक र पछाडि सवार दुबैजनाको ज्यान गएको हो । छ लेन सडकमा आज विहान करिब ११ बजे दुर्घटना भएको बताइएको छ ।
सूर्यविनायक तर्फ गइरहेको प्रदेश ३ को ८२५० नम्बरको पल्सरको एनएस मोटरसाइकललाई सोही तर्फ गइरहेको अर्को मोटरसाइकलले ठक्कर दिदा दुर्घटना भएको एक प्रत्यक्षदर्शीले बताए । ठक्कर दिने मोटरसाइकल फरार रहेको बताइएको छ । दुर्घटनामा मृत्यु भएका युवकको पहिचान हुन नसकेको महानगरीय ट्राफिक कार्यालय भक्तपुरका प्रमुख सुमन न्यौपानेले बताए । दुर्घटनाको थप विवरण आउन बाकी छ ।
अपडेट : चुनदेवी दुर्घटनामा ज्यान गुमाउनेहरुको सनाखत भएको छ । मृतकहरु बाँकेको नेपालगंज घर भई हाल काठमाडौ पुतलीसडक बस्ने अन्दाजी २० वर्षीय सुर्य ओली र भोजपुर चौकीडाडा गाउँपालिका घर भई हाल पुतलीसडक बस्ने अन्दाजी १८ वर्षीय सुमन गिरी रहेका महानगरीय प्रहरी परिसर भक्तपुरका सूचना अधिकारी रहेका डिएसपी दिपक गिरीले पुष्टि गरेका छन् । डिएसपी गिरीका अनुसार दुर्घटनापछि तत्कालै प्रहरी पुगी उनीहरुलाई घाइते अवस्थामा ठिमीस्थित मध्यपुर अस्पताल पुर्याइएको थियो । शुक्रवार मध्यान्ह १२:१० बजे उनीहरुको मृत्यु भएको सम्बन्धित चिकित्सकले घोषणा गरेका थिए ।
उक्त मोटरसाईकललाई अन्य कुनै सवारी साधनले ठक्कर दिई अनियन्त्रित भई दुर्घटना भएको हो वा तीब्र गतिको कारण आफै अनियन्त्रित भई दुर्घटना भएको हो भन्ने प्रहरीले यकिन गर्न नसकेको बताइन्छ । सो सम्बन्धमा थप अनुसन्धान कार्य भईरहेको डिएसपी दिपक गिरीले जानकारी दिए ।
