भक्तपुर उद्योग वाणिज्य संघका सस्थापक अध्यक्ष समेत रहेका साखः ग्रुपका अध्यक्ष गणेशभक्त साखःको निधनप्रति नेपाली काँग्रेसले शोक व्यक्त गरेको छ । नेपाली काँग्रेस भक्तपुर जिल्ला समितिका संस्थापक कोषाध्यक्ष समेत रहेकाले साख:को निधनप्रति नेपाली काँग्रेसले शोक व्यक्त गरेको हो ।

साख: को ९४ वर्षको उमेरमा शुक्रवार निधन भएको छ । शनिवार उनको अन्त्येष्टिमा नेपाली काँग्रेसको नेता कार्यकर्ताको बाक्लो उपस्थिति रहेको थियो । भक्तपुर जिल्ला सभापति दुर्लभ थापा, सचिव निशान ढुंगेल लगायतले भक्तपुर पार्टीको तर्फबाट साख:लाई अन्तिम श्रद्धान्जली अर्पण गरेका थिए । उनीहरुले पार्टीको झण्डा ओडाई साखःको अन्तिम विदाई गरे ।

सफल उद्योगी साख:को भक्तपुरको राजनीतिमा पनि ठूलो योगदान रहेको छ । भक्तपुरमा जन्मिएर भक्तपुरको औधोगिक क्षेत्रलाई उचाइ दिएका उनले काँग्रेसको संगठन निर्माणमा समेत उल्लेखनीय भूमिका निभाएका नेता निशान ढुंगेलले स्मरण गरे । उमेरले साथ नदिंदा पनि पार्टीको काममा उनको असाध्यै लगाव रहेको सचिव ढुंगेलले सम्झना गरे । साखःको निधनबाट भक्तपुर काँग्रेसले एक असल अभिभावक गुमाएको सभापति दुर्लभ थापा बताउछन ।

नेपाली काँग्रेस भक्तपुरले साखःको निधनमा शोक प्रकट गर्दै भक्तपुर जिल्लाभरीका पार्टी कार्यालयहरु आइतवार एक दिनका लागि बन्द गर्ने तथा पार्टीको झण्डा आधा झुकाउने निर्णय गरेको सचिव निसान ढुंगेलले जानकारी दिए । साखःको निधनप्रति पार्टी केन्द्रले समेत शोक प्रकट गरेको छ ।

दिवंगत साखःको ४ छोरा छन् । उनको श्रीमती र एक छोराको भने निधन भैसकेको छ । भक्तपुरमा साखः का उद्योगहरु नेपाल पेन्ट्स र साखः मेटल एन्ड एलाइड इन्डस्ट्री स्थापित छन् ।