२०७८ वैशाख १३भक्तपुर । मंगलवारदेखि जिल्ला प्रशासन कार्यालय भक्तपुरका अत्यावश्यक बाहेकका सम्पूर्ण सेवा बन्द हुने भएको छ ।
जिल्ला सुरक्षा समितिको १२ गते बसेको बैठकले कार्यालयले प्रदान गर्दै आएको अत्यावश्यक सेवा बाहेकका अन्य सेवाहरू एक हप्ता बन्द गर्ने निर्णय गरेको हो । कार्यालयले सोमवार एक सूचना जारी गर्दै विगत केही दिन देखि काठमाडौं उपत्यकामा कोभिड–१९ को संक्रमण दर उच्च रहेको र संक्रमण दर अझ बढ्दो क्रममा रहेकोले संक्रमणको उच्च दरलाई नियन्त्रण गर्न बढी भिडभाड हुने सरकारी कार्यालय लगायत अन्य कार्यालयमा भिडभाडको अवस्थालाई नियन्त्रण गरी सेवा प्रवाहलाई सुरक्षित र व्यवस्थित गर्न यस्तो निर्णय लिइएको जनाएको छ ।
यस्तै बढी भिडभाड हुने कार्यालयहरूले साप्ताहिकरुपमा सेवा प्रवाहको कार्यतालिका बनाई सार्वजनिक सेवाप्रवाहमा आलोपालोको वैकल्पिक व्यवस्था मिलाई भिडभाड कम गर्नुपर्ने पनि जनाइएको छ ।
स्थगित गरिएको सेवाहरूमा नयाँ नागरिकता, नागरिकता प्रतिलिपि र नाबालक परिचय पत्र राहदानी वितरण तथा सिफारिस हातहतियार दर्ता नवीकरण संस्था दर्ता तथा नवीकरण र पत्रपत्रिका दर्ता रहेका जारी सूचनामा जनाइएको छ । तर, शान्ति सुरक्षासँग सम्बन्धित निवेदन र मुद्दासँग सम्बन्धित कार्यहरू अन्य अत्यावश्यक सिफारिसलगायतका सेवा भने सूचारु नै रहने जनाइएको छ ।
