मध्यपुर थिमि नगरपालिकाद्वारा संचालित नेपाल कोरिया मैत्री नगरपालिका अस्पतालले अक्सिजन उत्पादनको परीक्षण शुरु गरेको छ । शुक्रवारबाट अस्पतालले अक्सिजन उत्पादनको परीक्षण शुरु गरेको हो ।

करिब पैसठ्ठी लाखको लागतमा जडान गरिएको अक्सिजन प्लान्टको सबै उपकरण जडान भएपश्चात परीक्षण उत्पादन शुरु गरिएको अस्पतालका प्रशासक रुपेश श्रेष्ठले जनाएका छन् । प्रशासक श्रेष्ठका अनुसार उत्पादन नै शुरु भैसकेको अवस्था भने छैन । केहि प्राविधिक समस्या भएकोले त्यसको समाधानका लागि समन्धित कम्पनीको तर्फबाट कार्य भैरहेको छ ।

अस्पतालका प्रशासक श्रेष्ठका अनुसार जडान गरिएको प्लान्टको उत्पादन क्षमता दैनिक करिब पन्ध्र सय लिटर छ । यसले दैनिक ३० बटा सिलिन्डर भर्ने क्षमता राख्दछ । उनले हाल अस्पतालमा ४३ जना कोभिड संक्रमितको उपचार भैरहेको र सबैलाई अक्सिजन अनिवार्य चाहिने अवस्था रहेको बताए । आफनै अक्सिजन प्लान्टबाट अक्सिजन उत्पादन भए पश्चात वर्तमान अक्सिजनको अभाव केहि हद सम्म अन्त्य हुने तर यो नै पर्याप्त भने नभएको उनको भनाइ छ ।

अस्पतालले अक्सिजन उत्पादन गरेको समाचार सार्वजनिक भएपछि उपचाररत बिरामीका आफन्त भने अन्योलमा रहेका छन् । अस्पतालले अक्सिजन अभाव नै रहेको भनेपछि उनीहरु सशंकित बनेका हुन् । प्रशासक श्रेष्ठले बास्तवमै उत्पादन शुरु नभैसकेकोले धैर्य गर्न बिरामीका आफन्तहरुलाई अनुरोध गरेका छन् । परिक्षण सफल भए केहि दिन भित्रै अस्पतालमै अक्सिजन उत्पादन हुने र यसले अक्सिजनको अभावका कारण उत्पन्न तनाव केहि हदसम्म अन्त्य हुने उनको भनाइ छ ।

नगरपालिकाका प्रमुख कार्यकारी अधिकृत चुडामणि पन्थीले प्राविधिक विषय भएकोले अस्पताल प्रशासनसंग बुझेर मात्र समाचार सस्प्रेषण गर्न समेत अनुरोध गरेका छन् । उनले अक्सिजन उत्पादनको विषयबाट जनताहरु उत्साहित भएका र यसले नगरपालिकालाई काम गर्न थप प्रेरित गरेको समेत बताए ।