प्रधानमन्त्री केपी शर्मा ओलीले प्रतिनिधिसभा सदस्यको रूपमा आफूले नयाँ सरकारको लागि समर्थन जुटाउने प्रयास गरिरहेको बताए ।पत्रकार सम्मेलन मार्फत उनले सो कुरा बताएका हुन्  ।

काँग्रेस र माओवादी मिल्दा पनि ११० जना मात्रै सांसद रहेको तर आफूसँग एक्लै १२१ जना सांसद रहेको भन्दै उनले किस्तीमा राखेर प्रधानमन्त्री पद टक्राउन नसकिने बताए ।

आफूलाई समर्थन नगरे अरुले पनि बहुमत जुटाउन नसक्ने र पुन: संसद विघटन हुने उनको चेतावनी छ । ”केपी शर्मा ओलीले प्रतिनिधिसभा विघटन गरेर देशलाई चुनावमा लग्यो भन्न पाइन्न ।” उनले भने ।

घेराबन्दी गरेर सरकार असफल बनाउने अनि दोष जति आफ्नो टाउकोमा हाल्ने काम नगर्नसमेत विपक्षी गठबन्धनलाई उनको आग्रह छ ।

उनले आफुसंग सैद्धान्तिक रूपले १२१ सिट भएको , २७ जना दलभित्रका सांसद विपक्षमा उभिएकाले जम्मा ९३ सांसदको समर्थन रहेको उल्लेख गरेका छन् ।

वैकल्पिक सरकार गठनका लागि विपक्षी गठबन्धनलाई आग्रह गर्न राष्ट्रपतिलाई आफूले लगाएको तर विपक्षी गठबन्धनले बेकारमा राष्ट्रपतिलाई बिबादमा तानिरहेको उनको आरोप छ । राष्ट्रपतिलाई महाअभियोग लगाउने विपक्षीको तयारीपछि उनले राष्ट्रपतिको बचाव गरेका हुन् ।

प्रधानमन्त्री ओलीले संविधानमा आफूले राजिनामा दिनुपर्ने व्यवस्था नभएको समेत जिकिर गरे । प्रतिपक्षीले वैकल्पिक सरकार दिए ठीक छ नदिए सहमतिका साथ राष्ट्रिय सरकार बनाउन आफू तयार रहेको तर बिपक्षीहरुले अन्य बिकल्प समेत दिन नसकेको उनको भनाइ छ ।