भक्तपुर, ११ जेठ २०७८उपत्यकामा लगाइएको निषेधाज्ञा फेरि एक साताका लागि थप गरिएको छ । कोभिड १९ संक्रमण दर नघटेको भन्दै थप एक साता निषेधाज्ञा थपिएको हो ।
मंगलबार उपत्यकाका तीनै जिल्ला भक्तपुर, ललितपुर र काठमाडौंका प्रमुख जिल्ला अधिकारीहरुले निषेधाज्ञा जेठ २० गते मध्यरातसम्म कायम रहने निर्णय गरेका हुन् । यस पटक थपिएको निषेधाज्ञा पहिलेको भन्दा थप कडा पारिएको जिल्ला प्रशासन कार्यालय भक्तपुरका सिडिओ प्रेमप्रसाद भट्टराइले बताएका छन् ।
भक्तपुरका सिडिओ भट्टराईले जनाए अनुसार थपिएको निषेधाज्ञामा बिहान ९ सम्म तरकारी, फलफूल, दूध, मासु र ग्यासको पसल मात्र खोल्न पाइने छ । तर किराना पसल, डिपार्टमेन्टल स्टोरहरु भने पूर्णरुपले बन्द गर्ने निर्णय भएको छ ।
त्यतिमात्र होइन, मर्निङ्ग वाक र इभिनिंग वाकमा समेत पूर्ण बन्देज लगाइएको सिडिओ भट्टराईले भक्तपुर पोस्टसंग भनेका छन् । निषेधाज्ञा अटेर गर्नेलाई हालै जारी कोभिड–१९ अध्यादेशअनुसार कारबाही गर्ने पनि निर्णय भएको बताइएको छ ।
अध्यादेशमा अनुमतिविना वा बिरामी ओसारपसार गर्ने प्रयोजनबाहेक सवारीसाधन चलाउन नपाइने व्यवस्था छ । त्यस्तो गरेको अवस्थामा दुईपांग्रेलाई २ हजार र अन्य सवारीसाधनलाई ५ हजार जरिवाना तिराउन सक्ने भनिएको छ ।
हिंडडुलमा रोक लगाएको अवस्थामा विना काम निस्किनेलाई दुई सय रुपैयाँ तिराउन सक्ने भनिएको छ । मर्निङ्ग वाक र इभिनिंग वाकमा निस्कनेले यस्तो जरिवाना तिर्नुपर्ने भएको छ ।
सरकारी कर्मचारी र अत्यावस्यक सेवा प्रवाहका कर्मचारीलाई समेत आवागमनमा समय तोकेर बिहान बिहान ९:३० देखि १ घण्टा र बेलुकी ५ बजेदेखि १ घन्टाको समय छुट्ट्याइएको छ ।
निषेधाज्ञा थप कडा भएकोले त्यसको कार्यान्वयनका लागि आफूले प्रहरीलाई निर्देशन गरेको बताउदै सिडिओ भट्टराईले आम जनसमुदायलाई सहयोगका लागि आग्रह समेत गरेका छन् ।