भक्तपुर, १५ जेठ २०७८सरकारले पत्रकारको उपचारमा शुल्क नलाग्ने व्यवस्था गरेको छ । सरकारी अस्पतालमा पत्रकारलाई शुल्क नलाग्ने भएको हो ।
अर्थमन्त्री विष्णु पौडेलले नयाँ आर्थिक वर्षको बजेट प्रस्तुत गर्दै पत्रकारलाई सरकारी स्वास्थ्य संस्थामा निःशुल्क उपचारको व्यवस्था मिलाइएको घोषणा गरेका हुन् । नेपाल पत्रकार महासङ्घको सदस्य रहेका तथा प्रेस काउन्सिलले जारी गरेको उपचार सुविधामा पर्ने पत्रकारलाई सरकारी स्वास्थ्य संस्थामा निःशुल्क उपचारको व्यवस्था गर्नेगरी बजेटमा व्यवस्था गरिएको अर्थमन्त्री पौडेलले प्रष्ट पारे ।
श्रमजीवी पत्रकारका लागि ७ लाख सम्मको दुर्घटना बीमा गरीने र त्यसको ५० प्रतिशत रकम सरकारले व्यहोर्ने समेत बताइएको छ ।त्यस्तै पत्रकारको क्षमता विकासका लागि आगामी वर्ष आमसञ्चार प्रशिक्षण प्रतिष्ठान गठन गरिने सरकारले जनाएको छ ।
त्यस्तै लोककल्याणकारी बिज्ञापन बापतको रकमबाट १० प्रतिशत पत्रकार कल्याण कोषमा जम्मा गर्ने र निजि क्षेत्रलाई पनि उनीहरुको कुल बिज्ञापन खर्चको १० प्रतिशत यस कोषमा राख्न प्रोत्साहित गरिने बताइएको छ ।