नेपाल मजदुर किसान पार्टी(नेमकिपा) ले २१ हजार थान मेडिकल मास्क (एन ९५) भक्तपुरका ६ वटा अस्पताललाई उपलब्ध गराएको छ । चिनियाँ कम्युनिस्ट पार्टी द्वारा नेमकिपालाई प्राप्त उक्त मास्क जिल्लास्थित ६ वटा अस्पताललाई उपलब्ध गराइएको हो ।

आइतवार नेमकिपाका केन्द्रीय सचिव एवम् निवर्तमान संघीय सांसद प्रेम सुवालले प्रत्येक अस्पतालमा पुगी मास्कहरु हस्तान्तरण गरेका हुन् । उक्त अवसरमा पार्टीका केन्द्रीय सदस्य एवं बागमती प्रदेश सांसद सुरेन्द्रराज गोसाई र जिल्ला अध्यक्ष न्हुच्छेभक्त फोजु लगायतका नेताहरु सहभागी रहेका थिए ।

उनीहरुले भक्तपुरस्थित भक्तपुर अस्पताल, भक्तपुर क्यान्सर अस्पताल र शहिद धर्मभक्त मानव अङ्ग अस्पताल लाई ५-५ हजार थान मास्क हस्तान्तरण गरेका छन् भने चाँगुनारायण नगर अस्पताल,मध्यपुर थिमिकोको नेपाल कोरिया मैत्री नगरपालिका अस्पताल र सूर्यविनायक नगर अस्पतालका लागि २ हजारका दरले मास्क हस्तान्तरण गरेको नेमकिपा भक्तपुर अध्यक्ष फोजुले जनाएका छन् ।

मास्क हस्तान्तरण गर्दै पार्टी सचिव सुवालले चिनियाँ कम्युनिस्ट पार्टीप्रति आभार समेत प्रकट गरे । आफ्नो पार्टीलाई प्राप्त सहयोग भक्तपुरका अस्पताललाई हस्तारण गरिएको र देशका अन्य अस्पताललाई पनि हस्तान्तरण गर्ने कार्यक्रम रहेको उनले बताए । उक्त अवसरमा सचिव सुवालले कोभिड बिरामीको उपचार र अस्पतालको अवस्थाबारे जानकारी समेत लिएका थिए ।

महामारीमा अग्रपङ्तिमा बसेर लडिरहेका स्वास्थ्यकर्मीहरूको मनोवल उकास्ने उद्देश्यले विशेषतः अस्पताल प्रयोजनका निम्ति ती मास्क नेमकिपाकातर्फ बाट वितरण गरिएको नेता सुरेन्द्रराज राज गोसाईले जानकारी गराए ।

एन ९५ मास्कको चरम अभावको यो बेला सहयोग प्रदान गरेकोमा नेमकिपाप्रति अस्पताल परिवारले आभार ब्यक्त गरेका छन्। भक्तपुर अस्पतालका अध्यक्ष मिलन सुवालले राजनीतिक तवरबाट गरिएको यो ज्यादै प्रशंसनीय कार्य भएको बताएका छन् । यसले अस्पताललाई कार्यसम्पादनमा सकारात्मक उर्जा मिलेको उनको भनाइ छ ।