भक्तपुर, ३ असार २०७८मध्यपुर थिमी-४ चारदोबाटो स्थित आईल्याण्डमा मोटरसाईकल ठक्कर खादा चालकको ज्यान गएको छ । मोटरसाईकल चालक जिल्ला सोलुखुम्बु चौलाखर्क-३ घर भई हाल जिल्ला काठमाण्डौ काडाघारी बस्ने वर्ष २७ को रमेश कुमार बस्नेतको ज्यान गएको हो ।
काठमाण्डौबाट भक्तपुर तर्फ आउदै गरेको बा ७७ प ५६०५ नं को मोटरसाईकल गएराति करिब ११ बजे आफै अनियन्त्रित भई सडक बिचमा रहेको आईल्याण्डमा ठक्कर खाई दुर्घटना भएको प्रहरीले जनाएको छ । उक्त मोटरसाईकलमा तीनजना सवार रहेका थिए । अन्य दुइजनाको त्रि.बि. शिक्षण अस्पताल महाराजगंज काठमाण्डौमा थप उपचार भईरहेको बताइएको छ ।
मोटरसाईकल पछाडी सवार जिल्ला उदयपुर ताप्ले गाउपालिका ५ घर भई हाल काडाघारी बस्ने वर्ष २२ को लोकेन्द्र मग्राती र जिल्ला सिन्धुली तिनपाटन गाउपालिका वडा नं. ५ घर भई हाल काडाघारी बस्ने वर्ष २५ को अमित जैरु रहेका छन् । उनीहरुको त्रि.बि. शिक्षण अस्पताल महाराजगंज काठमाण्डौमा उपचार भईरहेको डिएसपी दिपक गिरीले जानकारी गराए । दुर्घटनाबारे थप अनुसन्धान कार्य भईरहेको उनले बताएका छन् ।