भक्तपुर, १४ असारनेपाल प्रहरीको सर्वोच्च पद प्रहरी महानिरीक्षक(आईजी)मा फेरिपनि भक्तपुरकै प्रतिनिधित्व हुने बाटो खुलेको छ । बहालवाला प्रहरी महानिरीक्षक भक्तपुर कटुन्जेका शैलेश थापा क्षेत्रीको अवकाश पछि भक्तपुर पलासेँका सहकुल बहादुर थापा प्रहरी महानिरीक्षक बन्ने बाटो खुलेको हो ।
सोमबार गृह मन्त्रालयले प्रहरी नायब महानिरीक्षक (डीआईजी) थापालाई प्रहरी अतिरिक्त महानिरीक्षक (एआईजी) मा बढुवा गर्न सिफारिस गरेको छ । गृह सचिव महेश्वर न्यौपानेको अध्यक्षतामा आइतवार बसेको बढुवा समितिको बैठकले थापालाई एआईजीमा बढुवा गर्न सिफारिस गरेको हो । यस अघि मन्त्रिपरिषद बैठकले एउटा एआइजी पद थप्ने निर्णय गरेको थियो र सो पदमा सिफारिस हुने थापा भाग्यमानी प्रहरी अधिकारी भएका छन् । उनी पहिलो नम्बरमा डिआइजी सिफारिस भएका कारण पनि थपिएको माथिल्लो पदमा पुग्न सफल भएका गृह श्रोतको भनाइ छ ।
यसअघि एआईजी विश्वराज पोखरेल आईजीका एक्ला दाबेदार थिए। एआईजीमा सहकुल बहादुर थापाको बढुवा भएसंगै पोखरेलले थापासंग प्रतिस्पर्धा गर्नुपर्ने भएको छ । पोखरेल र थापा एकै ब्याचका प्रहरी अधिकारी हुन् । उनीहरु दुई मध्ये एक आगामी प्रहरी महानिरीक्षक बन्ने पक्कापक्की भएको छ । तुलानात्मक रुपले हेर्दा आगामी प्रहरी महानिरीक्षकमा पोखरेलको भन्दा थापाको पल्ला भारी भएको जानकारहरु बताउछन् ।
थापा सूर्यविनायक नगरपालिकास्थित नलिनचोक पलासेँका स्थायी वासिन्दा हुन् । पिता गणेशबहादुर थापा र माता ललितकुमारीका छोरा सहकुल बहादुर थापा २०४९ सालमा प्रहरी निरीक्षकबाट नेपाल प्रहरी सेवामा प्रवेश गरेका थिए । समयले साथ् दिएमा थापाले २०७९ वैशाखमै नेपाल प्रहरीको सर्वोच्च पद प्राप्त गर्नेछन् ।