भक्तपुर, १६ असार स्वास्थ्य चौकीहरु स्थानीय सरकार मातहत आएपछि स्थानीयले अझ राम्रो सेवा पाउने आशा गरिएपनि सूर्यविनायक नगरपालिका अन्तर्गत रहेको कटुन्जे स्वास्थ्य चौकीको अवस्था भने चिन्ताजनक देखिएको छ । स्वास्थ्य चौकीले प्रदान गर्ने सेवामा पहिलेको भन्दा अहिले गुणस्तर घटेको स्थानीयले गुनासो गरेका छन् ।
नगरपालिका र वडा कार्यालयको सक्रियतामा ल्याब समेत संचालन गरिएको भएतापनि कटुन्जे स्वास्थ्य चौकीमा कुनै दिन १ जना बिरामी समेत नपुग्ने देखिएको छ । दैनिक पचासौं बिरामीलाई उपचार सेवा पुर्याइरहेको यो स्वास्थ्य चौकीमा अचेल बिरामी सो मात्रामा नआउने गरेको कर्मचारीहरु नै स्वीकार गर्दछन ।
स्थानीयले स्वास्थ्य चौकीको स्तर खस्कनुमा इन्चार्ज स्वस्ती आचार्यको दोष देखेका छन् । सेवाग्राहीप्रति जिम्मेवार नबनी नगरपालिका र राजनीतिक दलका नेताहरुको चाकरीमा इन्चार्ज लागेको कारण स्वास्थ्य चौकीको स्तर खस्किएको स्वास्थ्य चौकीलाई नजिकबाट नियालीरहेका एक स्थानीय सेवाग्राहीले बताए । इन्चार्ज आचार्य प्राय कार्यकक्षमा नभेटिने, भेटिएपनि बिरामी जांचमा भन्दा गफमै व्यस्त हुने र सेवाग्राही मैत्री व्यवहार पनि नगर्ने हुनाले बिरामीहरु दोहोर्याएर नआउने समस्या देखिएको उनले आरोप लगाएका छन् । त्यतिमात्र होइन, इन्चार्ज आचार्यले कर्मचारीलाई कुशल नेतृत्व दिन समेत सकेकी छैनन । १३ जना कर्मचारी रहेको यस स्वास्थ्य चौकीमा इन्चार्जले मनपरी गरेर व्यवस्थापकीय कमजोरी गरेको र चौकीको साख नै गिराएको भन्दै कर्मचारी पनि रुष्ट बनेका छन् । उनले कर्मचारीमा गुट बनाउन खोजेको समेत बताइन्छ ।
कोभिड १९ विरुद्धको खोप दिंदा समेत निष्पक्ष नभएको आरोप खेप्नुपरेको भन्दै कर्मचारी असन्तुष्ट छन् । पछिल्लो समय खोप लगाउन जिल्ला जनस्वास्थ्य कार्यालयले खोप उपलब्ध गराउने भनेपनि इन्चार्जले बिबाद हुने तर्क राखेर पन्छिन खोजेको थाहा भएको छ । इन्चार्ज आचार्यले नगरपालिका र वडा कार्यालयमा पहुँच राख्ने हुँदा अन्य कर्मचारी उनीविरुद्ध आवाज उठाउन नसक्ने अवस्था देखिएको छ । नगर प्रमुख र वडाध्यक्षले आचार्यमाथि आँखा चिम्लेर बिस्वास गर्दा स्वास्थ्य चौकीको अवस्था बिग्रदै गरेको कर्मचारीहरु समेत बताउछन । इन्चार्ज आचार्यले कामजोरी गरेपनि स्थानीय सरकारले त्यसलाई सच्याउन नसक्ने हो भने कटुन्जे स्वास्थ्य चौकीमा शुन्य सेवाग्राहीको स्थिति हुनसक्नेतर्फ सचेत बन्नुपर्ने स्थानीयको सुझाव रहेको छ ।
इन्चार्ज आचार्यले भने आफूमाथिको आरोप निराधार रहेको बताएकी छन् । पहिले भन्दा अहिले बिरामीको चाप घटेको भएपनि बिरामी नै नआउने भन्ने कुरा सत्य नभएको उनले बताइन । दैनिक एक दर्जन बढी बिरामीलाई अहिलेपनि सेवा दिईरहेको उनले दावी गरेकी छन् । कोरोना संक्रमणका कारण स्वास्थ्य चौकीमा बिरामीको चाप घटेको उनको भनाइ छ । उनले आफू स्वास्थ्य चौकीको बिकासमा अहोरात्र लागिरहेको समेत जिकिर गरेकी छन् ।