भक्तपुर, २४ असार २०७८ सरकारी गाडीभित्र अश्लील क्रियाकलाप गरेको अभियोगमा एक महिलासहित तीन जना पक्राउ परेका छन् । भक्तपुर प्रहरीले उनीहरुलाई पक्राउ गरेको हो ।
महानगरीय प्रहरी वृत्त जगातीको प्रहरी टोलीले आपत्तिजनक अवस्थामा सरकारी गाडीभित्रबाट १ महिला र १ पुरुषलाई बुधवार पक्राउ गरेको भक्तपुर पोस्ट श्रोतले जनाएको छ । उनीहरुलाई निर्बस्त्र अवस्थामा पक्राउ गरिएको बताइएको छ । गाडी बाहिर कुरुवा बसेका अर्का पुरुष भने बिहीवार मात्र पक्राउ परेका हुन् । पायलट बाबा जाने बाटोमा गाडी रोकी गाडीभित्रै अश्लील हर्कत गरेको पाइएपछि उनीहरु प्रहरी फन्दामा परेका हुन् ।
उक्त सरकारी गाडी महिला, बालबालिका तथा ज्येष्ठ नागरिक मन्त्रालयको भएको जानकारी प्राप्त भएको छ । प्रहरीले गाडी नम्बर र पक्राउ परेका व्यक्तिबारे कुनै आधिकारिक सूचना सार्वजनिक गरेको छैन । भक्तपुर पोस्ट श्रोतका अनुसार पक्राउ परेका तीनै आरोपी उपर बिहीवार जिल्ला प्रशासन कार्यालय भक्तपुरबाट पाँच दिने म्याद थप गरी जगाती वृत्तले आवश्यक अनुसन्धान कार्य गरिरहेको छ ।