भक्तपुर, २८ असार २०७८ ,सोमबारभक्तपुर नगरपालिकाले निःशुल्क मादल प्रशिक्षणको तालिम सञ्चालन गरेको छ । नगरपालिकाको शिशु स्याहार केन्द्रमा कार्यरत १२ जना शिक्षिका तथा १२ जना आयाहरुलाई तालिम दिइएको हो ।
शिशु स्याहारमा मनरोञ्जनसहित स्याहार गर्नको लागि नगरपालिकाले तालिम सञ्चालन गरेको नगर शिक्षा प्रमुख हरि निरौलाले बताए । हाल पालिकामा ६ वटा शिशु स्याहार केन्द्र रहेका छन् । शिशु स्याहार केन्द्रका १२ शिक्षिका तथा १२ जना आयाहरुका लागि तालिम संचालन भएको हो । उक्त तालिम १५ दिन सम्म संचालन हुने र शिक्षिकालाई मादलको ताल सिकाइने बताइएको छ ।
शिशु स्याहारमा बच्चाहरुलाई पढाउने मात्र होइन, स्याहार्ने काम पनि गरिन्छ । उनीहरुलाई स्याहार्नको लागि सामान्य तरीकाले नसक्ने भएकोले पालिकाले केन्द्रमा कार्यरत सबै शिक्षिकाहरुलाई मादलको तालले थप सहयोग गर्ने विस्वास गरिएको छ ।
नगरपालिकाका अनुसार नानीहरुलाई सानै उमेर देखि संगीतको थेरापी दिन पालिकाले मादल प्रशिक्षणको महसुस गरेको हो । सानो बाजा र लोकप्रिय बाजा भएकोले मादलको छनौट र प्रशिक्षणको खोजी गरी प्रशिक्षण समेत सुरुवात भयो ।
तालिमपश्चात नानीहरुलाई मनोरन्जनका साथ कक्षामा उपस्थित गराउने प्रतिबद्धता सहभागीहरुको छ । घरबाट स्याहार केन्द्रमा आउने वातावरणमा सकारात्मक रुपमा सहयोग गर्नै सहभागीहरु बताउँछन ।