भक्तपुर, २८ असार २०७८पाँच दलीय गठबन्धन बनाएर प्रधानमन्त्री केपी ओलीको स्वेच्छाचारिता बिरुद्ध आन्दोलित बनेका शक्तिहरुबाट नेकपा एमाले(नेपाल पक्ष) बिमुख बन्ने देखिएको छ । आइतवार राति केपी ओली पक्ष र माधव नेपाल पक्षका नेताहरु सम्मिलित कार्यदलले १० बुँदे सहमति गरेसंगै यस्तो संकेत देखिएको हो ।
पाँच दलीय गठबन्धनको एक घटक नेकपा (माओवादी केन्द्र)का भक्तपुर अध्यक्ष डिपी ढकालले सहमति भएको भनिएको १० बुँदामा नेपाल पक्षको आत्मसर्पण देखिएको दावी गरेका छन् । अध्यक्ष ओलीको स्वेच्छाचारिता बिरुद्ध लडेको नेपाल पक्षलाई उनले प्रश्न गरेका छन्, ”ओलीका सबै निर्णय अब उप्रान्त मान्छौं भन्नुबाहेक १० बुँदामा के छ ?”
केपी ओलीले अहिलेसम्म गरेका निर्णयमा सहमत छौं भन्ने बाहेक सहमतिमा अरु कुनै कुरा नभएको नेता ढकालको भनाइ छ । ओलीको हालसम्मका सबै निर्णयमा सहमत छौं भन्ने एक बुँदामा हुने कुरालाई १० बुँदा देखाएर नाटक गरिएको उनले आरोप लगाएका छन् । उनले नेता नेपाललाई उनकै पक्षका कनिष्ठहरुले धोका दिएका समेत जिकिर गरे । जोजोलाई उनले आफ्नो ठाने र माया गरे उनैले धोका दिएर १० बुँदेमा माधव नेपाललाई ल्याइपुर्याएको उनको जिकिर छ । अध्यक्ष ढकालले यसलाई आफ्नैहरुबाट वरिष्ठ नेता नेपाललाई गरिएको धोकाको संज्ञा दिएका छन् । पाँच दलीय गठबन्धनबाट नेपाल पक्ष बाहिरिनु पर्ने आधार नदेखिएको भन्दै उनले नेपाल पक्षले आत्मसर्पण नै गर्यो भने पनि गठबन्धन कमजोर नहुने दावी गरेका छन् ।
सार्वजनिक भएको सहमति उपर वरिष्ठ नेता माधव नेपालले समेत असहमति जनाइसकेका सकेका छन् । सर्वोच्च अदालतको आदेशलाई प्रभावित गर्न सहमतिको नाटक मन्चन भएको हुनसक्ने उनले आशंका गरेका छन् । हेर्नुस सार्वजनिक सहमतिका १० बुँदा ।
