भक्तपुरमा होन्डा सोरुम गठ्ठाघरले होन्डा ब्रान्डको नयाँ स्कुटर सार्वजनिक गरेको छ । सोरुपले होन्डाको नयाँ स्कुटर ग्राजियाको बीएसभीआई मोडल सार्वजनिक गरेको हो ।

मध्यपुर ३ का वडाध्यक्ष प्रेम कुटुले सोमबार उक्त मोडलको स्कुटर सोरुममा एक कार्यक्रमका बीच सार्वजनिक गरेका हुन् । उक्त अवसरमा वडाध्यक्ष कुटुले दुई पाङ्ग्रे सवारी आवश्यकताको साधन भैसकेको भन्दै होन्डाको यो मोडलले राइडरको मन जित्नसकोस भन्ने शुभकामना समेत दिएका थिए ।

उक्त अवसरमा सोरुमका संचालक मिलन सिग्देलले सार्वजनिक गरिएको स्कुटरले तेल कम खाने र बढी माइलेज दिने दावी गरे । नेपालमा एफआइ इन्जिन भएको यो पहिलो स्कुटर भएको भनिएको छ । फ्युल इन्जेक्टेड (एफआइ) प्रविधिको इन्जिनका कारण यसले प्रदुषण नहुने कम्पनीको दावी छ । १२५ सिसिको नयाँ मोडलमा व्यावहारिक फिचर थप गरी पूर्ण रुपमा रि–डिफाइन गरिएको बताइएको छ । आकर्षक र स्टाइलिस लुक रहेको स्कुटरमा १ सय ५५ देखि १ सय ७१ एमएमसम्मको ग्राउण्ड क्लेरेन्स छ । स्कुटरमा स्पिडोमिटरमा माइलेज फिचर रहेको छ । जुन फिचरबाट रियल टाइम माइलेज, एभरेज माइलेजका साथमा कति किमीसम्म गुड्न सक्छ भनेर हेर्न सकिने बताइएको छ ।

सोरुमका संचालक सिग्देलले दिएको जानकारी अनुसार ड्रम ब्रेक भएको स्कुटरको मूल्य २ लाख मूल्य २ लाख ६९ हजार ९ सय र डिस्क ब्रेक भएकोको मूल्य २ लाख ८९ हजार ९ सय तोकिएको छ । उनले सुरुवाती बिक्रीको समयमा मूल्यमा केहि छुट समेत उपलब्ध गराइने जानकारी गराएका छन् ।