भक्तपुर,६ साउन नेपालका प्रथम जननिर्वाचित प्रधानमन्त्री एवं प्रजातान्त्रिक समाजवादका चिन्तक विश्वेश्वर प्रसाद कोइराला अर्थात विपी कोइरालाको ३९ औं स्मृति दिवसका अवसरमा नेपाली काँग्रेस भक्तपुरले विपीको तस्विरमा माल्यार्पण तथा वृक्षारोपण कार्यक्रम सपन्न गरेको छ ।
उक्त अवसरमा बुधवार पार्टी कार्यालयमा आयोजित कार्यक्रमलाई सम्बोधन गर्दै जिल्ला सभापति दुर्लभ थापाले विपीले अंगिकार गरेको सिद्धान्त आज पनि उत्तिकै सान्दर्भिक रहेको बताएका छन् । विपीको रास्ट्रिय मेलमिलापको नीति अहिले पनि उत्तिकै आवश्यक भएको उनको भनाइ छ ।
सभापति थापाले कम्युनिष्टको आन्तरिक कलहले अप्ठ्यारोमा परेको राजनीतिलाई नेपाली काँग्रेसले निकास दिएको जिकिर गर्दै विपीले देखाएको बाटो बाट सरकार बिचलित नबनी देश र जनताको हितमा काम गर्ने विश्वास समेत व्यक्त गरे ।
पार्टीको १४ औं महाधिवेशनको सन्दर्भमा समेत बोल्दै उनले पार्टी भित्र पूर्ण प्रजातन्त्र भएकोले योग्य व्यक्ति नेतृत्वमा आउने बाटो खुला रहेको दावी गरे ।
कार्यक्रममा नेपाली कांग्रेसका आमन्त्रित केन्द्रीय सदस्य रमा ढकाल, केन्द्रीय नीति तथा प्रशिक्षण विभागका सदस्य सुरेन्द्र के सी,उक्त अवसरमा पार्टी उपसभापति हरिप्रसाद नेपाल र भक्तपुर क्षेत्र नं. १ का कांग्रेस सभापति जीवन खत्री, पूर्व जिल्ला सभापतिहरु गणेशमान चक्रधर, महेश श्रेष्ठ, बागमति प्रदेशसभा सदस्यद्धय कृष्णलाल भँडेल र रजनी जोन्छें लगायतका नेता कार्यकर्ताहरुको सहभागिता रहेको थियो ।