भक्तपुर, २५ साउन २०७८भक्तपुर घर भएका गृह मन्त्रालयका सचिव महेश्वर न्यौपानेलाई भक्तपुरमै बसोबास गर्दै आएका अर्का सचिव टेक नारायण पाण्डेले प्रतिस्थापन गरेका छन् । सरकारले गृह सचिवमा पाण्डेलाई सरुवा गर्ने निर्णय गरेको हो ।
सोमबार साँझको मन्त्रिपरिषद् बैठकले भूमि व्यवस्था, सहकारी तथा गरिबी निवारण मन्त्रालयका सचिव पाण्डेलाई गृह सचिवमा सरुवा गर्ने निर्णय गरेको एक मन्त्रीले बताए । गृहसचिव न्यौपानेलाई भने प्रधानमन्त्री तथा मन्त्रिपरिषदको कार्यालयमा सरुवा गरिएको बताइएको छ ।
गृहमन्त्री बालकृष्ण खाणको पहिलो रोजाइ उनी नभएपनि प्रधानमन्त्री शेरबहादुर देउवाले पाण्डेलाई नियुक्त गर्न पहल गरेका श्रोतले जनाएको छ । श्रोतका अनुसार पाण्डे गृहमन्त्री बालकृष्ण खाणको दोश्रो रोजाइमा परेका थिए । थोरै बोल्ने शालीन स्वभावका पाण्डे बिषयबस्तुमा गहिरो अध्ययन गरी कार्यसम्पादन गर्ने गर्दछन ।
अर्घाखाँची स्थायी घर भएका पाण्डे भक्तपुरको सानोठिमीमा अस्थायीरुपले बसोबास गर्दै आएका छन् । उनी शिक्षा सेवाबाट सचिवमा बढुवा भएका हुन् । सानोठिमीस्थित शिक्षाका केन्द्रीय कार्यालयहरुमा लामो समय उनले कार्यालय प्रमुख रही कार्य गरेका छन् । सानोठिमीमा बसोबास गर्दै आएका सचिव पाण्डेको यहाँ आफ्नै घर भने छैन ।