भक्तपुर, १५ भदौ नेपाल मजदुर किसान पार्टीका अध्यक्ष नारायणमान बिजुक्छें (रोहित) ले जनतालाई शिक्षित र देशलाई समृद्ध बनाउन पुस्तकालयको महत्वपूर्ण भूमिका रहने बताएका छन् । राष्ट्रिय पुस्तकालय दिवसको अवसरमा मंगलबार भक्तपुर नगरपालिका द्वारा आयोजित विचार गोष्ठी लाई सम्बोधन गर्दै अध्यक्ष बिजुक्छेंले सो कुरा बताएका हुन् ।
पुस्तकालय भनेको ज्ञानको भण्डार भएको भन्दै अध्यक्ष बिजुक्छेँले यसको बिकासमा स्थानीय सरकारले साथ् र सहयोग दिनुपर्नेमा जोड दिए । नेपालका पुस्तकालयहरु अझै व्यवस्थापन हुन बाँकी रहेकोमा दुख व्यक्त गर्दै उनले स्थानीय सरकारको ध्यान जानुपर्ने आवश्यकता औल्याए ।
भक्तपुरमा रहेको सार्वजनिक पुस्तकालयहरुको व्यापक सदुपयोग गर्नपर्ने बताउदै उनले पुस्तकालयहरुको स्तरवृद्धि गर्न र व्यवस्थित सञ्चालनको लागि आर्थिक प्राविधिक प्राज्ञिक लगायत आवश्यक सहयोग गर्न निर्देशन समेत दिएका थिए ।
समाजमा आमूल परिवर्तनको निम्ति शिक्षा नै प्रमुख जग भएको भन्दै अध्यक्ष बिजुक्छेले हरेक विद्यालय तथा शैक्षिक संस्थाहरुमा सुविधायुक्त पुस्तकालयको अवधारणालाई प्रभावकारी रुपमा कार्यान्वयन गर्न सुझाव समेत दिएका थिए ।
कार्यक्रममा भक्तपुर नगरपालिकाका प्रमुख सुनिल प्रजापतिले नगरपालिकाले जनज्योति पुस्तकालय संचालन गरिरहेको अवगत गराउदै यसलाई थप व्यवस्थित र समायानुकूल सुधार गर्ने प्रयास गरिरहेको बताए ।
पुस्तकालय नयाँ बिषय अध्ययन अनुसन्धान गर्नेहरुको लागि अत्यन्त उपयोगी ठाउँ भएको भन्दै प्रमुख प्रजापतिले प्राचीन पुस्तक र पत्रपत्रिकाहरु पनि पुस्तकालयहरुमा सुरक्षित गर्नुपर्ने आवश्यकता औल्याएका छन् ।
उक्त अवसरमा भक्तपुर नगरपालिकाका उपप्रमुख रजनी जोशी,इतिहासविद् डा. पुरुषोत्तमलोचन श्रेष्ठ, कार्यपालिका सदस्य छोरीमैया सुजखु (प्रजापति),वडा नं. ९ का वडाध्यक्ष रबिन्द्र ज्याख्व, प्रमुख प्रशासकीय अधिकृत रामलाल श्रेष्ठ,भक्तपुर पुस्तकालय संघका अध्यक्ष सुरेन्द्र दुवाल, प्रगति पुस्तकालयका अध्यक्ष रबिन्द्रप्रसाद कुसी, सहिद राजकुमार स्मृति पुस्तकालयका अध्यक्ष कृष्णप्रसाद सुवाल र सहिद स्मृति पुस्तकालयका अध्यक्ष नारायणप्रसाद मचामसीले पुस्तकालयहरुको इतिहास, वर्तमान अवस्था र चुनौतीहरुबारे आआफ्नो धारणा व्यक्त गरेका थिए ।
