भक्तपुर, १५ भदौ नेकपा(एमाले) विभाजित भई बनेको माधवकुमार नेपाल नेतृत्वको नेकपा (एकीकृत समाजवादी) मा भक्तपुरका एक प्रदेश सांसद समेत खुलेका छन् । भक्तपुरको निर्वाचन क्षेत्र नं. २ अन्तर्गत मध्यपुर थिमि क्षेत्रबाट प्रत्यक्षतर्फ निर्वाचित प्रदेशसभा सदस्य डा. राजेन्द्रमान श्रेष्ठले नेपाल नेतृत्वको नयाँ पार्टी रोजेका हुन् ।
प्रदेश सांसद डा श्रेष्ठले मंगलवार हेटौडा स्थित बागमति प्रदेश निर्वाचन कार्यालय पुगेर नेकपा (एकीकृत समाजवादी)को पक्षमा सनाखत गरेका छन् । डा श्रेष्ठ लगायत नेकपा(एमाले)बाट निर्वाचित बागमती प्रदेश सभाका १२ जना सदस्यले नेकपा (एकीकृत समाजवादी) रोजेका हुन् ।
निर्वाचन क्षेत्र नम्बर २ का प्रतिनिधि सभा सदस्य रहेका एमाले नेता महेश बस्नेतले भक्तपुरमा एमालेका वडा सदस्य समेत नेपाल नेतृत्वको नयाँ पार्टीमा नगएको सार्वजनिक भाषण गरिरहदा उनकै क्षेत्रबाट प्रदेश सभामा प्रत्यक्ष निर्वाचित सांसद डा श्रेष्ठ नेपालको नयाँ पार्टीमा खुलेका छन् । नेपाल नेतृत्वको नेकपा (एकीकृत समाजवादी) रोज्ने उनी नेकपा एमाले भक्तपुरका उच्च तहका जनप्रतिनिधि हुन् ।
बौद्धिक नेता डा श्रेष्ठ नेकपा (एकीकृत समाजवादी)मा खुलेसंगै भक्तपुरमा एमालेलाई ठुलो धक्का लागेको छ । भक्तपुर एमालेलाई यसले सांगठनिक रुपमा मात्र नभई मनोबैज्ञानिक रुपमा समेत कमजोर बनाएको बताइएको छ ।
बागमती प्रदेशमा हालसम्म डा. राजेन्द्रमान श्रेष्ठ,राजेन्द्र पाण्डे, मुनु सिग्देल, रमा आलेमगर, लक्ष्मण लम्साल, वसुन्धरा हुमागाईं, माधव पौडेल, वसन्त मानन्धर, पार्वती सिलवाल, कुसुम कार्की, इन्द्रमाया गुरुङ र कृष्ण खनाल नेपाल नेतृत्वको नेकपा (एकीकृत समाजवादी)मा खुलेका छन् ।