भक्तपुर, ४ असोज २०७८भक्तपुरको सूर्यविनायक- २ बालकोटस्थित महेन्द्र शान्ति स्कूलबाट चारदोबाटो तर्फ आउदै गरेको ट्र्याक्टर दुर्घटना हुँदा चालकको ज्यान गएको छ । बालुवा र सिमेन्ट बोकेको लु. ४ त २५४२ नं. को ट्र्याक्टर दुर्घटना हुँदा बर्दिया घर भै बाल्कोट नै बस्ने २५ वर्षका रोशन चौधरीको ज्यान गएको हो ।
आइतवार साझ पौने ५ बजे भएको दुर्घटना लगत्तै प्रहरी घटनास्थल पुगेको थियो । तत्कालै घटनास्थलमा चारदोबाटो स्थित ड्युटीमा रहेको प्रहरी टोली पुगी स्थनीयहरुको सहयोगमा गम्भीर घाईते चालक चौधरीलाई ट्याक्टरको स्टेरिङले च्यापिएको अवस्थामा उद्धार गरी मध्यपुर अस्पताल ठिमी पुर्याएको प्रहरीले जनाएको छ । उपचारकै क्रममा साझ पौने ६ बजे उनको ज्यान गएको डिएसपी दिपक गिरीले जानकारी गराएका छन् ।
ठिमी बृत्तका इन्स्पेक्टर इन्द्रमणी अधिकारीको कमान्डमा खटिएको अनुसन्धान टोलीले सडकको बिग्रेको अवस्था र क्षमता भन्दा बढी भार बोकेको कारण दुर्घटना भएको प्रारम्भिक अनुमान गरेको छ । महेन्द्र शान्ति स्कुलबाट चारदोबाटो तर्फ आउदै गरेको भित्री सडक खण्ड उकालो ओरालो तथा खाल्डा खुल्डी भई बिग्रिएको र बालुवा तथा सिमेन्टको लोड अत्याधिक भएको कारणले उकालोमा तान्न नसकी एक्कासी ट्याक्टरको अगाडीको ईन्जिन माथि उठ्न गई चालकलाई स्टेरिङले च्यापेको र उपचारकै क्रममा ज्यान गएको महानगरीय प्रहरी परिसर भक्तपुरले जनाएको हो । घटना सम्बन्धमा थप: अनुसन्धान भईरहेको प्रहरीको भनाइ छ ।