माधव नेपाल नेतृत्वको नेपाल कम्युनिष्ट पार्टी (एकीकृत समाजवादी)ले भक्तपुर नगर कमिटी बिस्तार गरेको छ । पार्टीको पहिलो नगर भेलाबाट प्रविन बाटीको अध्यक्षतामा ३१ सदस्यीय नगर कमिटी गठन गरिएको हो ।

भक्तपुरका जुझारु एवं निष्ठावान युवा नेताका रुपमा परिचित बाटी भक्तपुरमा नेकपा (माले) स्थापना गर्ने पुराना कम्युनिष्ट नेता स्व. नारायण भक्त बाटीका छोरा हुन् । बाटीले आफ्नो बलबुताले भ्याएसम्म पार्टीको संगठन बिस्तार गर्ने बताएका छन् ।

नेकपा(एस) को भक्तपुर नगर उपाध्यक्षमा भने रमेश बल्ल रहेका छन् । त्यसैगरी सचिवमा रिकेश कर्माचार्य र सहसचिवमा नवीन त्वीत्वीले जिम्मेवारी पाएका बताइएको छ ।शुक्रवार सम्पन्न नगर भेलाको अध्यक्षता नारायण बाबू नायवाले गरेका थिए । उक्त नगर सभालाई पार्टीका प्रदेश सदस्य माइलाबाबू देउला, जिल्ला अध्यक्ष श्यामसुन्दर बस्नेत लगायतले सम्बोधन गर्दै प्रशिक्षण तथा मार्गनिर्देशन गरेका थिए ।