भक्तपुर जिल्लामा सरुवा भै कार्यभार सम्हालेकी नयाँ सिडिओ रूद्रादेवी शर्माले नेमकिपाका अध्यक्ष नारायणमान बिजुक्छेंसँग भेटवार्ता गरेकी छन् । मंगलवार बिहान निजी निवास कमलविनायक पुगी उनले अध्यक्ष बिजुक्छेसंग भेटवार्ता गरेकी हुन ।

उक्त भेटवार्ता कुनै एक विषयमा केन्द्रीत नभई  शिष्टाचार भेट मात्र भएको पार्टीका केन्द्रीय सदस्य एवं बागमती प्रदेश सभा सदस्य सुरेन्द्रराज गोसाईले जानकारी गराए । उक्त अवसरमा जिल्लाको शान्ति-सुरक्षा, जनस्वास्थ्य, संस्कृति तथा सम्पदा संरक्षण, सरसफाइ तथा वातावरण, शिक्षण संस्था तथा अस्पताल र महिला समस्या तथा न्यायिक चेतना लगायतका विषयमा छलफल भएको उनको भनाइ छ ।

भेटवार्ताको क्रममा सिडिओ शर्मालाई अध्यक्ष बिजुक्छेंले जनताको पक्षमा काम गर्न र विवाद रहित कार्यसम्पादन गर्न सुझाव दिएका थिए । उनले पार्टीद्वारा प्रकाशित पुस्तकहरु उपहार दिदै सिडिओ शर्मालाई सफल कार्यकालको शुभकामना समेत दिए ।