भक्तपुर, १७ असोज २०७८भक्तपुरका अग्रज पत्रकार केदार बनेपाली सम्मानित भएका छन । भक्तपुरका युवा फोटोग्राफरहरुको संस्था किपाःग्राफी भक्तपुरले उनलाई सम्मान गरेको हो ।
भक्तपुर नगरपालिकाका प्रमुख सुनिल प्रजापतिले उनलाई सम्मान पत्रद्वारा सम्मान गरेका हुन् । सम्पदा संरक्षणका लागी फोटोग्राफी भन्ने नारा लिई स्थापित किपाःग्राफी भक्तपुरले आफ्नो स्थापनाको छैठौं वर्ष प्रवेश गरेको अवसरमा आयोजित कार्यक्रमका बीच उनलाई सम्मान गरिएको हो । फोटोग्राफी गौरव सम्मान – २०७८ बाट उनी सम्मानित भएका हुन् ।
किपाःग्राफी भक्तपुरले प्रत्येक वार्षिकोत्सव कार्यक्रममा अग्रज फोटोग्राफरलाई सम्मान गर्नेक्रममा यो वर्ष बनेपालीलाई सम्मान गरिएको बताइएको छ । पत्रकार बनेपाली वि.सं २०२५ सालबाट फोटोग्राफीमा लागेका व्यक्तित्व हुन् । नेपाल टेलिभिजनको पहिलो भक्तपुर सम्बादाता भई उनले भक्तपुरको दृश्य टेलिभिजनमा उतारेका छन् वरिष्ठ फोटोग्राफर एवं सिनोमाटोग्राफर बनेपाली भक्तपुरको दतात्रय निवासी हुन ।
उक्त अवसरमा किपाःग्राफी भक्तपुरद्वारा आयोजित भक्तपुरको नवदुर्गा नाच राष्ट्रिय फोटो प्रतियोगिताका उत्कृष्ट फाटोग्राफरहरुलाई नगद पुरस्कार एवं मायाको चिनो वितरण गरिएको थियो । भक्तपुरको नवदुर्गा नाच राष्ट्रिय फोटो प्रतियोगिता २०७८ मा ललितपुर जिल्लाका फोटोग्राफर विकास खड्गी प्रथम, काठमाण्डौंका फोटोग्राफर रोहित महर्जन द्वितिय र भक्तपुरका फोटोग्राफर कृष्णश्वरी दुवाल तृतिय भएका थिए । उनीहरुलाई क्रमशः नगद रु.३०हजार, २० हजार र १० हजार प्रदान गरिएको छ ।
कार्यक्रममा वरिष्ट फोटोग्राफर जगदिश तिवारी,किपाःग्राफी भक्तपुरका सल्लाहकार एवं भक्तपुर साकोसका अध्यक्ष बलराम प्रजापतिले शुभकामना मन्तव्य राखेका थिए । कार्यक्रमको सभापति एवं किपाःग्राफी भक्तपुरका अध्यक्ष अच्युत प्रजापति,उपाध्यक्ष पदम सुन्दर शाक्य,सचिव बालकृष्ण प्रजापति र भक्तपुर नवदुर्गा नाच राष्ट्रिय फोटो प्रतियोगिताका संयोजक रविता किसी लगायतले किपा:ग्राफी र प्रतियोगिताको बारेमा प्रकाश पारेका थिए ।