भक्तपुर, ७ कात्तिक २०७८राष्ट्रिय परिचयपत्रका लागि विवरण भर्ने सम्बन्धमा सूर्यविनायक नगरपालिकामा अभिमुखीकरण कार्यक्रम सम्पन्न भएको छ । जिल्ला प्रशासन कार्यालय भक्तपुरले नगरपालिकाका जनप्रतिनिधि र पंजीकरण अधिकारीहरुलाई अभिमुखीकरण गर्ने कार्य सम्पन्न गरेको हो ।
आइतवार नगरपालिकाको सभाहलमा आयोजित कार्यक्रममा राष्ट्रिय परिचय पत्रको महत्व र यसका लागि विवरण भर्ने प्रक्रियामाथि प्रकाश पारिएको थियो । जिल्ला प्रशासन कार्यालय भक्तपुरकी सहायक सिडिओ सिता परियारले यसबारे प्रस्तुती दिँदै कसरी राष्ट्रिय परिचयपत्र लाई त्रुटिरहित र विश्वासिलो बनाउने भन्ने बारे बताएकी थिइन् । उनले नागरिकताको आधारमा विवरण भर्दा हुनसक्ने गल्तीहरुबारे सचेत गराउदै रुजु अधिकारीलाई जिम्मेवार भएर राष्ट्रिय अभियान सफल पार्न प्रोत्साहित गरेकी थिइन् ।
उक्त अवसरमा भक्तपुरकी सिडिओ रुद्रादेवी शर्माले राष्ट्रिय परिचयपत्रका लागि विवरण भर्ने सम्बन्धमा जनप्रतिनिधि र रुजु अधिकारीका प्रश्नहरुको उत्तर दिँदै थप जिम्मेवार बन्न र आ आफ्नो दायित्व इमान्दारिताका साथ् पुरा गर्न अपिल गरिन । जिल्लाका नेपाली नागरिकहरुलाई राष्ट्रिय परिचयपत्र उपलब्ध गराउनका लागि विवरण दर्ता कार्य अनिवार्य भएको भन्दै उनले विवरण दर्ता गर्नका लागि आएका नागरिहरुले पेश गरेका दरखास्त लगायतका विवरणहरु भर्ने, रुजु गर्ने र प्रमाणित गर्ने कार्य नागरिकता अनुरुप चुस्त दुरुस्त हुनुपर्नेमा जोड दिईन् ।
राष्ट्रिय परिचयपत्र बहुउपयोगी र भविष्यमा अनिर्वाय जस्तै हुने भएकाले सबै नागरिकको विवरण भर्ने वातावरण बनाइदिन उनले जनप्रतिनिधिहरु समक्ष अनुरोध समेत गरेकी थिइन् ।
कार्यक्रममा सूर्यविनायक नगरपालिका वडा नम्बर २ का वडाध्यक्ष कमलनाथ आचार्यले स्थानीय तहमा आएका पंजीकरण अधिकारीहरु तालिम प्राप्त नभएका र स्थानीयलाई विवरण भर्न प्रोत्साहित गर्नुको साटो भड्काउने शैलीमा प्रस्तुत हुनेगरेका आरोप लगाउदै अभियान सफल हुनेमा आशंका प्रकट गरेका थिए ।
उक्त अवसरमा नगर प्रमुख बासुदेव थापाले राष्ट्रिय परिचयपत्रको महत्व बारे स्थानीय जनतालाई बुझाउनु जरुरी रहेको बताए । उनले विवरण संकलन कार्यमा नगरपालिकाले आवश्यक सहयोग गर्ने प्रतिवद्धता समेत प्रकट गरेका थिए । राष्ट्रिय परिचय पत्रको लागि विवरण संकलन कार्यमा खटिएका कर्मचारीहरुको व्यवहार सेवाग्राही मैत्री हुनुपर्ने सुझाव दिदै उनले नगरपालिकाले प्रत्येक वडामा यसको अनुगमन गर्ने समेत स्पष्ट पारे ।
कार्यक्रममा सूर्यविनायक नगरपालिकाकी उपप्रमुख जुना बस्नेत लगायत जनप्रतिनिधिहरु, प्रमुख प्रशासकीय अधिकृत राजेन्द्रप्रसाद कडेल,जिप्रकाकी प्रमुख प्रशासकीय अधिकृत उर्मीला खतिवडा, वडाका रुजु अधिकारीहरु लगायतको सक्रिय सहभागिता रहेको थियो ।
के हो राष्ट्रिय परिचयपत्र
“राष्ट्रिय परिचयपत्र” व्यक्तिका परिचय प्रमाणिकरणको डिजिटल समाधान (digital solution) हो । डिजिटल विशेषता रहेकाले अहिलेको आधुनिक युगमा यसलाई सार्वजनिक सेवासँग अन्तरसम्बन्धित गराई विविध कामका लागि प्रयोगमा ल्याउन सकिने हुनाले यसको अत्यन्त महत्व रहेको छ । यसलाई सफलतापूर्वक आफ्नो देशमा लागू गराउने धेरै देशहरुको नीति रहेको छ भने कतिपय देशमा यसको सफल प्रयोग समेत भैरहेको छ । विना भेदभाव सबै नागरिकहरुले यस्तो डिजिटल परिचयपत्र प्राप्त गर्नु भनेको राष्ट्रिय समावेशीकरणलाई समेत टेवा पुर्याउनु हो ।
नेपाल सरकारको गृह मन्त्रालय अन्तर्गत राष्ट्रिय परिचयपत्र तथा पञ्जीकरण विभागले यसको जिम्मेवारी पाएको छ । जिल्लामा जिल्ला प्रशासन कार्यालयलाई यसको जिम्मा दिईएको छ ।
यस्तो छ अवस्था
जिल्ला प्रशासन कार्यलयमा“फिल्ड कार्यालय” स्थापना गरिएको छ । यसको मातहत स्थानीय वडाहरुमा इकाई खडा गरी विवरण संकलन गरिने व्यवस्था मिलाइएको छ । भक्तपुरको सूर्यविनायक र चाँगुका केहि वडाहरुमा इकाई स्थापना गरी विवरण भर्ने कार्य शुरु समेत भैसकेको अवस्था छ । भक्तपुरमा हालसम्म १८ हजार नेपाली नागरिकले विवरण भरिसकेका जिप्रका भक्तपुरको भनाइ छ । यसै महिनाबाट यो कार्य सबै नगरपालिकामा बिस्तार गरिने बताइएको छ ।