स्पेनकी सभामुख ब्लान्का मार्टिन डेल्गाडोले ऐतिहासिक भक्तपुर दरवार क्षेत्रको अवलोकन भ्रमण गरेकी छन् । नेपाल भ्रमणमा रहेकी डेल्गाडोले बिहीवार साँझ भक्तपुर दरवार क्षेत्रको अवलोकन भ्रमण गरेकी हुन् ।

उनको नेतृत्वमा आएको २४ सदस्यीय स्पेनिस संसदीय प्रतिनिधिमण्डललाई भक्तपुर नगरपालिकाका प्रमुख सुनिल प्रजापति, उपप्रमुख रजनी जोशीसहितको टोलीले भक्तपुरमा स्वागत गरेको थियो । उक्त टोलीलाई पुष्पगुच्छा, भादगाउँले टोपी, खादा, परम्परागत थैली र जुजु धौं प्रदान गरी भक्तपुर दरबार क्षेत्रको प्रवेशद्धारमा उनीहरुले स्वागत गरेका थिए । स्पेनिस प्रतिनिधिमण्डलमा स्पेनका प्रदेशमन्त्री, मेयर, पत्रकार, व्यापारीहरुलगायत सहभागी छन् ।

स्पेनी संसदकी सभामुख डेल्गाडो बागमती प्रदेश सभाका सभामुख सानुकुमार श्रेष्ठको निमन्त्रणामा नेपाल भ्रमणमा आएकी हुन् । भक्तपुर भ्रमणको क्रममा प्रदेश सभाका सभामुख श्रेष्ठ, उपसभामुख र प्रदेश सांसदहरुको समेत सहभागिता रहेको थियो ।

उक्त अवसरमा नगर प्रमुख प्रजापतिले प्रतिनिधिमण्डललाई भक्तपुर दरबार क्षेत्रमा अवस्थित सांस्कृतिक, पुरातात्विक एवम् ऐतिहासिक महत्वका सम्पदाहरुको स्थलगत अवलोकन गराएका थिए ।

भ्रमण टोलीले भक्तपुर दरबार क्षेत्रमा अवस्थित राष्ट्रिय कला संग्रहालय, स्वर्णद्वार, पचपन्न झ्याल दरबार, सिद्धिलक्ष्मी मन्दिर, यक्षेश्वर महादेव मन्दिर, सिलु महादेव मन्दिर र चर्तुब्रम्ह महाविहार अवलोकन गर्दै टौमढी क्षेत्रको पाँचतले मन्दिर, भैरवनाथ मन्दिरको स्थलगत अवलोकन गरेका नगरपालिकाकी प्रेस संयोजक कीर्तिका प्रजापतिले जनाएकी छन् ।

भ्रमणमा सहभागीहरुले भक्तपुर नगरपालिकाले व्यवस्था गरेको सांस्कृतिक नाचहरु माक प्याखं, कवांचा प्याखं र जंगली प्याखंको अभिरुचिपूर्वक अवलोकन गरेका थिए ।

प्रमुख प्रजापतिले सभामुख डेल्गाडोसहितको प्रतिनिधिमण्डल टोलीलाई ‘मयुरको झ्याल’ र नगरपालिकाका प्रकाशनहरु मायाको चिनो उपहार प्रदान गरेका छन् ।

विहीबार टोलीले ललितपुरको मंगलबजार पुगेर पाटन दरबार क्षेत्रको समेत अवलोकन भ्रमण गरेको छ । टोलीलाई ललितपुर महानगरपालिकाका मेयर चिरिबाबु महर्जन लगायतले पाटनमा स्वागत गरेका थिए ।

६ दिनको भ्रमणमा आएको स्पेनी प्रतिनिधिमण्डल कात्तिक १६ गते स्वदेश फर्कने कार्यक्रम छ ।