महानगरीय प्रहरी वृत्त जगातीका प्रमुख रहेका डिएसपी राजेश थापाको सरुवा भएको छ । प्रहरीको नियमित सरुवा बमोजिम उनको सरुवा भएको हो ।

नेपाल प्रहरीले ९५ जना डीएसपी सरुवा गर्दा भक्तपुर अन्तर्गत जगाती वृत्तका प्रमुख थापालाई जिप्रका बारा पुर्याइएको छ । जिल्ला प्रहरी कार्यालय बारामा उनी एसपीको कमाण्डमा रहने गरी सरुवा भएका हुन् । कार्यालय प्रमुखको रुपमा नेतृत्व गरेका प्रहरी अधिकृतलाई अर्को कार्यकाल कार्यालय प्रमुख मातहत राखिने प्रचलन रही आएको छ ।

प्रहरी महानिरीक्षक शैलेश थापा क्षेत्रीको निर्णयअनुसार भएको सरुवामा उनको गृह वृत्तसमेत रहेको जगातीमा राम बहादुर केसीलाई ल्याइएको छ । केसीलाई लुम्बिनी प्रदेश अन्तर्गतको प्रहरी तालिम केन्द्रबाट सरुवा गरी जगाती वृत्त प्रमुख बनाइएको प्रहरी प्रधान कार्यालयले जनाएको हो ।

यसैगरी महानगरीय प्रहरी परिसर भक्तपुरमा कार्यरत परिसरका सूचना अधिकारी समेत रहेका दिपक गिरीको पनि सरुवा भएको छ । गिरीलाई प्रहरी प्रधान कार्यालयमा सरुवा गरिएको बताइएको छ । उनको ठाउँमा जिल्ला प्रहरी कार्यालय डोल्पाका प्रमुख रहेका डिएसपी राजु पाण्डे सरुवा भई आउने भएका छन् ।

प्रहरीमा वर्तमान कार्यकाल कार्यालय प्रमुख नरहेका प्रहरी अधिकृतलाई कार्यालय प्रमुखका रुपमा सरुवा गरिने प्रचलन रहेपनि गिरीलाई भने प्रहरी प्रधान कार्यालय पुर्याइएको छ ।