भक्तपुर, २९ कात्तिक २०७८भक्तपुरको मध्यपुर थिमी नगरपालिकास्थित शंखधर चोकमा सुन्दर शंखधर पार्कनिर्माण सम्पन्न भएको छ । आइतबार उक्त पार्कको उदघाटन समेत गरिएको छ । नगर साझेदारी कार्यक्रम अन्तर्गत काठमाडौ महानगरले उपलब्ध गराएको आर्थिक सहयोगमा शंखधर पार्क निर्माण भएको हो । काठमाडौँ महानगरका प्रमुख विद्यासुन्दर शाक्यले आइतबार विशेष कार्यक्रमका बीच नवनिर्मित पार्कको उदघाटन गरेका हुन् ।
उक्त अवसरमा प्रमुख शाक्यले अन्तर नगर साझेदारी अन्तर्गत आफूहरूले उपत्यकाका १२ वटा र उपत्यका बाहिर रहेका नगरपालिकालाई समेत आर्थिक सहयोग गरेको जानकारी गराए । ‘ती नगरपालिका क्षेत्र भित्र धार्मिक तथा पर्यटकीय पार्क तथा बहुउद्देश्यीय उद्यान निर्माण भइरहेका छन् । शंखधर पार्क तिनैमध्येको एउटा हो ।’ शाक्यले भने ।
काठमाडौँमा पाइने सेवा सुविधा देशका विभिन्न ठाउँमा पु¥याएर काठमाडौँ सँगै छ भन्ने महसुस गराउने प्रयास स्वरुप सहयोग प्रदान गरिएको उनको भनाइ छ ।
कार्यक्रमलाई सम्वोधन गर्दै मध्यपुर थिमी नगरपालिकाका प्रमुख मदनसुन्दर श्रेष्ठले काठमाडौँ महानगरपालिकाको सहयोगबाट करीब १९ रोपनी क्षेत्रफलमा पानीको झरना, झुण्डिएको बगैँचा, ढुंगेधारा, डवली, वाकिङ रोड निर्माण गरिएको जानकारी दिए । यसमा काठमाडौँ महानगरपालिकाको २ करोड र मध्यपुर थिमीको ४ करोड गरी जम्मा ६ करोड रुपैयाँ खर्च भएको प्रमुख श्रेष्ठको भनाइ छ ।
कुनै समय फोहोरको पहाडमा नाक थुनेर हिड्नु पर्ने ठाउँ अहिले हेर्न र घुम्न लायक पार्क बन्यो । जनप्रतिनिधिले जनताको सेवा र सहजताका लागि जिम्मेवार भएर काम गर्छन् भन्ने यो एउटा उदाहरण भएको उनले जिकिर गरे ।
कार्यक्रममा महानगरकी उपप्रमुख हरिप्रभा खड्गी श्रेष्ठले काठमाडौँ आफ्नो कर्म घर र भक्तपुर माइती भएको भन्दै मध्यपुरको बिकासमा योगदान गर्न पाउदा खुशी ब्यक्त गरेकी थिइन् ।
उदघाटन कार्यक्रममा जनप्रतिनिधि र स्थानीयहरुको सहभागीता रहेको थियो ।