सानोठिमी, २० पुस २०७८सानोठिमीस्थित शैक्षिक गुणस्तर परीक्षण केन्द्र(इआरओ)मा निमित्त महानिर्देशक रहेका उपसचिव शिवकुमार सापकोटाको बढुवा भएको छ । उनी शिक्षा प्रशासनको सहसचिवमा बढुवा भएका हुन् ।
लोक सेवा आयोगको बढुवा सूचना अनुसार कार्यक्षमताको आधारमा हुने बढुवाको लागि सापकोटालाई सह सचिव पदमा बढुवा सिफारिस गर्ने बढुवा समितिले निर्णय गरेको संघीय मामिला तथा सामान्य प्रशासन मन्त्रालयले जनाएको छ । मन्त्रालयले एक सूचना मार्फत सोमबार सापकोटा सहसचिवमा बढुवा सिफारिस भएका बताएको हो ।
बिभिन्न जिल्लामा शिक्षा अधिकारीको रुपमा कार्य गरेका सापकोटा शिक्षक किताबखानाको प्रमुख समेत रहीसकेका छन् । भक्तपुरको लौहकींथलीमा बस्दै आएका मिजासिलो स्वभावका सापकोटा शिक्षा प्रशासनका काविल कर्मचारीको रुपमा गनिन्छन । उपसचिव हुँदा नै सहसचिव प्रमुख हुने शिक्षाको प्राज्ञिक केन्द्रको रुपमा रहेको शैक्षिक गुणस्तर परीक्षण केन्द्रको प्रमुखको रुपमा उनी कार्यरत रहेका छन् । कार्यक्षमताको आधारमा हुने बढुवाको लागि सापकोटाले पूर्णाङ्क(अंक १००) प्राप्त गरी सहसचिवमा बढुवा भएका हुन् ।