भक्तपुर, २४ पुस २०७८नेपाल पत्रकार महासंघ, जिल्ला शाखा भक्तपुरले पत्रकार बाबुकाजी साछेँ श्रेष्ठलाई पुरस्कृत गरेको छ । आफ्नो २५ औं स्थापना दिवसको अवसर पारेर शाखाले उनलाई स्व भगवान महर्जन स्मृति पत्रकारिता पुरस्कारबाट पुरस्कृत गरेको हो ।
शुक्रवार मध्यपुरथिमिको यचु पार्टी भेन्यूमा आयोजित स्थापना दिवस तथा पुरस्कार वितरण कार्यक्रमका बीच पत्रकार श्रेष्ठलाई स्व. भगवान महर्जन स्मृति पत्रकारिता पुरस्कार प्रदान गरिएको थियो । उक्त पुरस्कारको राशी रु १० हजार रहेको छ ।
भक्तपुर शाखाका सदस्य पत्रकार श्रेष्ठ थिमृङ मासिकका प्रकाशक सम्पादक हुन् । मध्यपुर सञ्चार समाजका अध्यक्ष एवं प्रेस सेन्टर नेपाल भक्तपुर शाखाका उपाध्यक्ष समेत रहेका श्रेष्ठ विगत ३ दशकदेखि पत्रकारिता क्षेत्रमा सक्रिय रहेका छन् ।
कार्यक्रममा नेपाल पत्रकार महासंघका केन्द्रीय अध्यक्ष विपुल पोख्रेल, केन्द्रीय सचिव एवम् भक्तपुर शाखाका पूर्व अध्यक्ष नारायण सुन्दर किलम्बु, भक्तपुर अध्यक्ष जगत कृष्ण प्रजापति र पुरस्कारदाता मिना महर्जनले पुरस्कृत श्रेष्ठलाई नगद,माला,खादा र प्रमाणपत्रले सम्मान प्रदान गरेका थिए ।
उक्त अवसरमा मैयादेवी शिल्पकार स्मृति पत्रकारिता पुरस्कारबाट पत्रकार मोहन बल्ल पुरस्कृत भएका थिए । उक्त पुरस्कारका सस्थापक नारायण भक्त शिल्पकारले महिला पत्रकारका लागि अर्को एक पुरस्कारको घोषणा समेत गरे ।
अध्यक्ष प्रजापतिको सभापतित्व एवं सचिव संजीप घिमिरे शुभचिन्तकद्वारा संचालित कार्यक्रममा बागमती प्रदेशका प्रेस रजस्ट्रार रेवती सापकोटा, भक्तपुर सिडिओ रुद्रादेवी शर्मा,पत्रकार महासंघका केन्द्रीय सचिव गोबिन्द चौलागाईं, केन्द्रीय सदस्यद्वय शन्तराम बिडारी र ज्ञान पौडेल,लोकतान्त्रिक छापामाध्यमका अध्यक्ष दामोदर दवाडी, पत्रकार महासंघ उपत्यका प्रदेशका अध्यक्ष सृजन झा,उपाध्यक्ष रोजिना थापा, महासचिव टेनिस रोका, सचिव अमर भुजु, नेपाली कांग्रेस सूर विनायकका सभापति निशान ढुङ्गेल लगायतको आतिथ्यता रहेको थियो । कार्यक्रममा शाखाका सस्थापक अध्यक्ष रमेश खड्काले शाखा स्थापनाको अनुभव बाढ्दै सबै मिलेर भक्तपुर शाखालाई नमूना बनाएर अघि बढ्नुपर्ने बताएका थिए ।
