भक्तपुर, २४ पुस २०७८नेपाल पत्रकार महासंघ, जिल्ला शाखा भक्तपुरले प्रदान गर्दै आएको मैयादेवी शिल्पकार स्मृति पत्रकारिता पुरस्कारबाट पत्रकार मोहन बल्ल पुरस्कृत भएका छन् । आफ्नो २५ औं स्थापना दिवसको अवसर पारेर शाखाले उनलाई शुक्रबार सो पुरस्कार प्रदान गरेको हो ।
मध्यपुरथिमिको यचु पार्टी भेन्यूमा आयोजित स्थापना दिवस तथा पुरस्कार वितरण कार्यक्रमका बीच पत्रकार बल्ललाई मैयादेवी शिल्पकार स्मृति पत्रकारिता पुरस्कार प्रदान गरिएको थियो । उक्त पुरस्कारको राशी रु २ हजार ५ सय रहेको छ ।
भक्तपुर शाखाका सदस्य पत्रकार बल्ल इमेज च्यानल संग आवद्ध छन् । बिभिन्न सञ्चार माध्यममा भक्तपुर रिपोर्ट्र रही सकेका बल्ल अहिले इमेजखबर डट्कमका डेस्क सम्पादक रहेका छन् ।
कार्यक्रममा नेपाल पत्रकार महासंघका केन्द्रीय अध्यक्ष विपुल पोख्रेल, केन्द्रीय सचिव एवम् भक्तपुर शाखाका पूर्व अध्यक्ष नारायण सुन्दर किलम्बु, भक्तपुर अध्यक्ष जगत कृष्ण प्रजापति र पुरस्कारदाता नारायण भक्त शिल्पकारले पुरस्कृत बल्ललाई नगद,माला,खादा र प्रमाणपत्रले सम्मान प्रदान गरेका थिए ।
उक्त पुरस्कारका सस्थापक नारायण भक्त शिल्पकारले महिला पत्रकारका लागि अर्को एक पुरस्कारको घोषणा समेत गरे ।
अध्यक्ष प्रजापतिको सभापतित्व एवं सचिव संजीप घिमिरे शुभचिन्तकद्वारा संचालित कार्यक्रममा बागमती प्रदेशका प्रेस रजिस्ट्रार रेवती सापकोटा, भक्तपुर सिडिओ रुद्रादेवी शर्मा,पत्रकार महासंघका केन्द्रीय सचिव गोबिन्द चौलागाईं, केन्द्रीय सदस्यद्वय शन्तराम बिडारी र ज्ञान पौडेल,लोकतान्त्रिक छापामाध्यमका अध्यक्ष दामोदर दवाडी, नेपाली कांग्रेस सूर्यविनायकका सभापति निशान ढुङ्गेल, पत्रकार महासंघ उपत्यका प्रदेशका अध्यक्ष सृजन झा,उपाध्यक्ष रोजिना थापा, महासचिव टेनिस रोका, सचिव अमर भुजू लगायतको आतिथ्यता रहेको थियो । कार्यक्रममा शाखाका सस्थापक अध्यक्ष रमेश खड्काले शाखा स्थापनाको अनुभव बाढ्दै सबै मिलेर भक्तपुर शाखालाई नमूना बनाएर अघि बढ्नुपर्ने बताएका थिए ।