भक्तपुरमा राष्ट्रिय निजी तथा आवासीय विद्यालय एशोसियसन नेपाल (नेशनल प्याव्सन) को २४ औँ स्थापना दिवस मनाइएको छ । नेशनल प्याव्सन भक्तपुरले मंगलवार एक कार्यक्रमका बीच स्थापना दिवस मनाएको हो ।

स्थापना दिवसको अवसर पारेर नेशनल प्याव्सन भक्तपुरले शुभकामना आदानप्रदान एवं समसामयिक विषयमा अन्तरक्रिया कार्यक्रम समेत सम्पन्न गरेको जिल्ला अध्यक्ष संजय खड्काले जनाएका छन् । नेशनल प्याव्सन भक्तपुरका अध्यक्ष संजय खड्काले केक काटेर कार्यक्रमको उद्घाटन गरेका थिए ।

उक्त अवसरमा अध्यक्ष खड्काले सदस्य विद्यालयहरुको सुदृढिकरण गरे मात्र छाता संगठन पनि मजबुत हुन सक्ने भन्दै सदस्य विद्यालयहरुको “पूर्व प्राथमिक तह स्तरोन्नति” कार्यक्रम ल्याइएको जानकारी दिएका थिए । उक्त कार्यक्रमले विद्यालयहरुको स्तरोन्नति हुने उनले विस्वास व्यक्त गरेका छन् । अध्यक्ष खड्काले कार्यक्रममा नेशनल प्याव्सन भक्तपुरका सदस्य विद्यालयहरुमा कोभिड-१९ को असर र विद्यालय बन्द हुँदा कसरी पठनपाठन प्रभावकारी बनाउने भन्ने विषयमा अन्तरक्रिया गरिएको जानकारी गराए ।

अन्तरक्रिया कार्यक्रममा वर्तमान अवस्थामा कोभिड १९ का कारण शिक्षा क्षेत्र नै सबैभन्दा बढी मारमा परेको भन्दै सबै एकजुट भई यसका बिरुद्ध लड्नुको बिकल्प नभएको निष्कर्ष निकालिएको बताइएको छ ।  उक्त अवसरमा निवर्तमान जिल्ला अध्यक्ष तथा सल्लाहकार जिबि खड्का, उपाध्यक्ष शिवकृष्ण कवां, सचीव जय प्रकाश राई लगायत पदाधिकारी र एन प्याब्सन भक्तपुरका प्रिन्सिपलहरु सहभागी रहेका प्रिन्सिपल रमेश सिटौलाले बताए ।