भक्तपुर, २७ पुस २०७८भक्तपुरमा विद्यार्थीहरुले कोरोना विरुद्धको अमेरिकी खोप ‘मोर्डना’ लगाएका छन । १२ देखी १७ वर्ष उमेर समूहका विद्यार्थीले सो खोप लगाएका हुन् ।
भक्तपुरका विद्यालयमा अध्ययनरत विद्यार्थीहरु लक्षित गरी जारी खोप अभियान अन्तर्गत मंगलवारसम्म करिब ६ हजार भन्दा बढी विद्यार्थीले मोर्डना खोप लगाएका स्वास्थ्य कार्यालय भक्तपुरका प्रमुख कृष्णबहादुर मिजारले बताएका छन् । मिजारका अनुसार मंगलवारसम्म जिल्लाकोकरिब ६ हजार भन्दा बढी विद्यार्थीले मोर्डना खोप लगाएका छन् भने यो क्रम जारी नै छ ।
चाँगुनारायण र सूर्यविनायक नगरपालिकाभित्रका विद्यालयहरुमा खोप अभियान सम्पन्न भएको तर मध्यपुर थिमि र भक्तपुर नगरपालिकाका विद्यालयहरुमा भने मंगलवारदेखी खोप अभियान शुरु भएको मिजारले जानकारी गराए । नगरपालिकासंग मिलेर स्वास्थ्य कार्यालयले खोप अभियान संचालन गरेको हो ।
सिसिएमसिको सिफारिसमा शिक्षा मन्त्रालयले विद्यालय बन्द गर्ने निर्णय गरेपनि खोप अभियान भने जारी रहने उनको भनाइ छ ।
भक्तपुर नगरपालिकाले खोप अभियान बिहान ९ बजेदेखि ३ बजेसम्म सञ्चालन हुने जनाएको छ ।खोप लगाउन विद्यार्थीहरुले विद्यालयको परिचयपत्र अनिवार्य साथमा ल्याउनुपर्ने प्रावधान बनाएको बताइएको छ । यसले कुन विद्यालयका कति विद्यार्थीले खोप लगाए भन्ने तथ्यांक थाहा हुने नगरपालिकाले जनाएको छ ।
खोप अभियानको लागि भक्तपुर नपाले विभिन्न विद्यालय तथा कलेजहरुमा खोप केन्द्र तोकेको र मंगलवार उल्लेख्यरुपमा विद्यार्थीहरु उपस्थित भई खोप कार्यक्रममा सहभागी भएका भक्तपुर नगरपालिकाको भनाइ छ ।
