भक्तपुर, २९ पुस २०७८भक्तपुर नगरपालिकाका प्रमुख सुनिल प्रजापति र सिडिओ रुद्रादेवी शर्माले खोप केन्द्रको स्थलगत अवलोकन गरेका छन् । विद्यार्थी लक्षित खोप केन्द्रको उनीहरुले स्थलगत अवलोकन गरेका हुन् ।
विहीवार साकोथास्थित विद्यार्थी निकेतन मावि खोप केन्द्र पुगेका प्रमुख प्रजापति र सिडिओ शर्माले खोप केन्द्रको अवस्थाबारे जानकारी लिएका थिए । खोपप्रती विद्यार्थी र शिक्षकको धारणा एवं स्वास्थ्यकर्मीको काम र व्यवस्थापनको बारेमा बुझेका बताइएको छ । उनीहरुले उक्त अवसरमा आवश्यक निर्देशन समेत दिएका थिए । उक्त खोप केन्द्रबाट १ हजार २ सय बढी विद्यार्थीले खोप लिएका प्रधानाध्यापक सर्जनी जोशीले जानकारी गराइन ।
प्रमुख प्रजापति र सिडिओ शर्माले विहीवार सल्लाघारीस्थित सैनिक महाविद्यालय र तेखापुखुस्थित मेधा माविमा रहेको खोप केन्द्रको समेत अवलोकन निरीक्षण गरी आवश्यक निर्देशन दिएका थिए । उक्त अवसरमा जिल्लास्थित सुरक्षा प्रमुखहरु, वडाध्यक्षहरु र नगर शिक्षा अधिकारी लगायतको उपस्थिति रहेको थियो ।
भक्तपुर नगरपालिकाले विद्यालयलाई खोप केन्द्र तोकी मंगलवारदेखि खोप कार्यक्रम संचालन गरेको छ । कोरोना विरुद्धको अमेरिकी खोप ‘मोर्डना’ लगाउने उक्त कार्यक्रममा १२ देखी १७ वर्ष उमेर समूहका विद्यार्थी रहेका छन् । बिहान ९ बजेदेखि ३ बजेसम्म सञ्चालन हुने खोप कार्यक्रममा खोप लगाउन विद्यार्थीहरुले विद्यालयको परिचयपत्र अनिवार्य साथमा ल्याउनुपर्ने प्रावधान बनाइएको नगर शिक्षा कार्यालयले जनाएको छ ।