भक्तपुर, ३० पुस २०७८साहित्यकार अभय श्रेष्ठले साझा पुरस्कारबाट प्राप्त रकम फिर्ता गरेका छन् । आर्थिक अभावले थलिएको साझा प्रकाशनको पुनर्जीवनका लागि भन्दै उनले आफूले पुरस्कारमा प्राप्त रकम फिर्ता गरेका हुन् ।
शुक्रवार एक कार्यक्रमका बीच साझा प्रकाशनले पुरस्कार घोषणा गरेको ९ वर्षपछि साहित्यकारहरुलाई पुरस्कृत गरेको हो । साझाले साहित्यकार श्रेष्ठलाई रु १० हजार राशीको गरिमा सम्मान प्रदान गरेको छ । आफ्नो साहित्यिक प्रकाशन मासिक पत्रिका गरिमामा प्रकाशित ‘भुइँचालो’ कथाका लागि कथाकार अभय श्रेष्ठलाई ‘गरिमा सम्मान पुरस्कार’ (गद्य )तर्फबाट पुरस्कार प्रदान गरिएको साझाले जनाएको छ ।
प्राप्त पुरस्कारको नगद राशी रु १० हजार भने श्रेष्ठले साझा प्रकाशनका अध्यक्ष डा विजय सुब्बालाई नै फिर्ता गरेका छन् । भक्तपुरको गुण्डुमा घर भएका साहित्यकार श्रेष्ठ एक कुशल पत्रकार,स्तम्भकार एवं लेखक पनि हुन् ।
साझाबाट प्रकाशित भएको कवि ठाकुर बेलवासेको ‘त्रासमा ईश्वर’ कविता संग्रहलाई त्यस वर्षको सर्वोत्कृष्ट कृतिका रुपमा नगद ५१ हजार राशि सहितको ‘साझा पुरस्कार’ समेत शुक्रवार प्रदान गरिएको छ । कार्यक्रममा एक दर्जन साहित्यकारहरु विविध विधामा पुरस्कृत भएका छन् । पुरस्कार वितरण कार्यक्रममा भूमी व्यवस्था, गरिबी निवारण तथा सहकारी मन्त्री शशी श्रेष्ठ, शताब्दी पुरुष संस्कृतिविद् सत्यमोहन जोशी र साझाका अध्यक्ष डा विजय सुब्बाले पुरस्कार प्रदान गरेका थिए ।